Pagtubag sa Bokasyon Gipakusgan sa Dayosis sa Digos

Gipakusgan karon sa Dayosis sa Digos ang kampanya alang sa pagpalambo sa bokasyon ngadto sa pagkapari ug pagkarelihiyoso aron sa pagpadayon sa gimbuhaton diha sa pagserbisyo subay sa sugo sa Ginoo.

Atol sa ika-walo ka tuig nga kapistahan sa St. John Paul II College Seminary, Kibanban, Sinawilan, Digos City gipahayag ni Rev. John Flor Mangrobang, Vocation Director nga dako ug halapad ang misyon, apan sa pagkakaron gamay lang ang nitubag sa tawag sa Ginoo nga mosulod sa pagkapari ug pagkarelihiyoso.

“Gisaulog sa Dayosis sa Digos ang bulan sa bokasyon, atol sa buwan sa Santos nga Rosario, nga adunay tema: Steer Up the Gift of Vocation, hain ang simbahan nagadapit gayud sa katawhan, nga daghan pa unta mag-ampo sa bokasyon, ngadtu na sa pagkapari ug pagkarelihiyuso, tungud daghan ang atimanon, sa Parasan sa Ginoo”. Pahayag ni Rev. Mangrobang.

Gidugang ni Rev. Mangrobang nga sa pagkakaron ang Dayosis sa Digos adunay 34 ka mga seminarista gikan sa Propaedeutic Stage hantud sa Configuration Stage ingun man adunay 34 sab ka mga pari, ug duna sab mga edaran kon senior citizen, busa niining pagsaulog sa buwan sa bokasyon, gipakusgan kanunay ang panawagan ug pag-awhag, nga adunay motubag sa tawag sa Ginoo aron mo serbisyo.

“Gipahimangnoan ang tanang binunyagan nga adunay katungdanan, sa pagpukaw, sa gasa sa Dios sa matag usa, ilabi na gayud ang mga gitawag nga mapaminawan aron sab adunay pagtubag” Dugang ni Rev. Mangrobang.

Gipunting sa Vocation Director nga karong panahona, ang mga edaran nga kaparian, puhon sa umaabot, aduna na silay mga di makaya nga buhaton, tungud sa edad, kinahanglan nga madugangan ang motubag sa tawag alang sa dakong misyon, ilabi na diha sa pagsangyaw sa pulong sa Ginoo. (Photos: Bien Abanos)