Espiritung Nagdilaab sa Pagkapiniyalan sa Ika-28 nga Kapiyestahan sa San Miguel Panacan

“Kon lig-on ang inyong pagtoo, abli kita kanunay nagpaabot kon kanus-a ang timaan nga anaa si Hesus, makakita kita og daghang milagro, daghang mga San Miguel Arkanghel sa atong kinabuhi. Ug kon ingon ana na kita, kung makakita na kita kung unsa kita ka gamhanan, kung unsa kita ka pinalangga sa Dios. Then, without knowing, kita usab mahimong anghel alang sa uban,” – Archbishop Romulo G. Valles, D.D.

Nagsentro sa tema, “Kinabuhi sa Kristohanong Pagkapiniyalan: Sukaranan sa Parokyanong Kaambitan sa Sinodo,” gisaulog sa San Miguel Parish Panacan ang ika-28 nga kapiyestahan sa ilang patron, San Miguel Arkanghel. Diha, ang selebrasyon wala lamang naglangkob sa usa ka adlaw nga panagdait ug paglipaylipay apan halos usa ka bulan nga preparasyon ug mabungahong paggamit sa mga adlaw bago ang mismong kapiyestahan.

“Ang Good News karon nagpahinumdom nga, ‘Hoy, mga parokyano sa Panacan, remember that life is a serious nga gubat sa pagpili kanunay sa maayo, isalikway ang daotan,’” matod pa ni Archbishop Valles sa iyahang pamalandong sa Pontifical Mass niadtong ika-29 sa Setyembre, mismong adlaw sa kapiyestahan.

“Apan dili na lalim, tungod kay ang atong kontra sa maong gubat, limbongan, ingon nila ang gubat dili konprontahe nga makita nimo ang uniporme sa kaaway. Apan kining gubata, matod sa unang pagbasa, ang atong kontra, limbongan, mangingilad ang atong kalaban,” mipadayon siya.

Busa, aron sa pagkontra sa mga limbongan ug mga panag-away, gisangga kini sa San Miguel Panacan pinaagi sa mga panagtambayayong ug pagpakita sa pagkapiniyalan sa katawhan sa mga kalihokan sa Parokya.

Niadtong ika-17 sa Setyembre, gipahigayon ang Rito sa Kumpirmasyon nga diin adunay kapin 450 ka mga kumpirmahanan ang mitambong. Mahitungod usab kini sa pinaluag nga mga lagda ug pagdili sa Simbahan maong ubay-ubay usab ang nakadawat sa Sakramento sa Kumpirmasyon – mga bata, mga kaslunon, ug mga hamtong nga wala pa kadawat sa nahsigotang sakramento.

Human, sa ika-24 sa Setyembre, nakita ang pagtabangay ug pag-inambitay sa kusog, oras, ug kahinguhaan sa mga parokyano pinaagi sa pagtambong sa tinuig nga Brigada sa Parokya. Matag ministriya ug mga organisayon adunay mga nagkadaiyang dapit diin didto sila manglimpyo ug humanon ang mga gihatag nga buluhaton kanila. Nanguna ang mga GKK Servant Leaders (GSLs), nga gilangkuban sa PsK, PsL, PsA, PsP, PsKB, PsB, SoCCom, ug ang mga Gift Bearers, LEM, PREX, ug uban pang naghandom nga makatabang isip pagprepara sa umaabot nga piyesta.

Ug kadtong ika-20 sa Setyembre, gisugdan ang Novena nga gidumalaan sa mga kaparian nga niagi sa Parokya ni San Miguel pipila ka tuig na ang milabay. Nanguna si Rev. Fr. Mervin George Maglana, ang kasamtangang Kura Paroko, nga gisundan nila Rev. Fr. Pedro Maniwang, Rev. Fr. Arman Bacalso, Rev. Fr. Proceso Gimeno, Jr., Rev. Fr. Jovilo Bongay, Rev. Fr. Edsel Paloma, Rev. Fr. Rey Sabuero. Ug sa adlaw sa bisperas ug Fiesta Caravan, si Rev. Msgr. Julius Rodulfa.

Sa mismong kapiyestahan, human ang tulo ka gipahigayon nga Fiesta Mass, adunay programa ug fellowship nga giandam diin nagkatigom ang mga GSLs ug mga miyembro sa Parokya isip pagsaulog ug pagpasidungog sa patron. Niadtong adlawa, gitapos ang halos tulo ka bulan nga Fiesta League pinaagi sa Basketball ug Volleyball Championship Game. Nahimo usab nga highlight ang pagrampa ug koronasyon sa mga nagkadaiyang Miss Food Bank nga gikan sa lainlaing sona. Nahimo usab nga lingaw ang pagsaulog pinaagi sa mga pagpadayag sa mga GSLs sa nagkadaiyang performances sa ilahang ministriya ug ang Parade of Angels nga diin ang mga bata ang nagdala ug nahimong representante sa lainlaing klase sa mga anghel. Gitapos ang tibuok selebrasyon sa usa ka maanindot ug mabulukon nga Community Praise and Worship gikan sa PREX Panacan.

Sa katapusan, ato untang mahinumdoman ug ibutang sa kasingkasing ang mga panapos nga pulong sa atong Arsobispo: “San Miguel nga Arkanghel, tabangi kami. Tabangi kami nga magbinuotan sa among kinabuhi, isip indibidwal, mga pamilya, mga katilingban. Tabangi kami nga mamahimong buotan sa among mga kinabuhi. Tabangi kami nga sa matag higayon sa among kinabuhi, uban sa imong pagpanalipod kanamo Sr. San Miguel, kanunay kami nga magpili sa maayo nga buhat sa among kinabuhi.” (Ma. Joneila Laruya)