Unang Kapistahan sa GKK Sto. Rosario Balinsuag

Nahimong makahuloganon ang Oktubre 7, 2022 alang sa mga lumulupyo sa Balinsuag tungod kini man ang unang higayon nga sila nagsaulog sa ilang kapistahan human subling natukod ang ilang kapilya niadtong miaging tuig ug kini uban sa ilang tema: “Sta. Maria, Rayna sa Santos nga Rosaryo Manlalaban Natong mga Kristyano.”

Pasado alas-dyes gisugdan ang Santos nga Misa nga gipanguluhan ni Father Arnold Balaquinto, kura paroko sa San Roque Parish, Malabog. Sa iyang homiliya, iyang gitagaan og gibug-aton ang dakong pagtagad sa bili sa pag-ampo sa Santos nga Rosaryo ug nga kita unta sa kanunay mag-ampo og mamalandong niini isip kabahin sa atong kinabuhi. “Kung gusto ka mahisuod pag-ayo ang imong kasing-kasing sa sagradong kasing-kasing ni Kristo, kinahanglan mahisuod usab nimo ang putli nga kasing-kasing ni Santa Maria,” matud pa niya. Iya usab nga gipasalamatan ang mga pangulo sa katilingban nga maoy nanguna sa mga kalihukan sa simbahan ginagmay man o dinagko. Kini mao sila Ricardo Galan-PSK, Bro. Alger Bugna-PSL, Julito Crodua-PSA, Marjorey Amaba og John Mark Lisondra- PSP, magtiayon nga Mr. Marlon Lisondra og Mrs. Ma. Elsa Lisondra-PSKB og Jozeil Crodua-PSB. Lakip nga iyang gipasalamatan ang mga miyembro nga naningkamot usab para sa kalambuan sa tanan. Sama sa naandan, sa maong selebrasyon anaa usab ang presensya sa mga pangulo sa sona dos kinsa nagpakita sa ilang suporta pinaagi sa pag gahin sa ilang oras.

Human sa paniudto, adunay paglingaw-lingaw alang sa mga bata, batan-on og ingon sa mga hamtong. Isa sa mga dula mao ang “slow racing’’ kon pahinayay og padagan sa motor. Og kini nagpakita sa hulagway sa kinabuhi, nga dili diay sa tanang higayon kinahanglan magdali-dali, kay ang pag-una wala nagkahulogan og kadaugan.

Mapasalamaton si Bro. Ricardo Galan-PSK sa tanang mga naningkamot alang sa kalampusan sa selebrasyon, hilabi na gayud kang Father Arnold nga nagpadayag sa iyang suporta ngadto sa katilingban pinaagi sa daghan kayo nga mga paagi.

Matag katilingban, adunay tagsa-tagsa ka mga hagit og kakulangan, og sa tawhanon nga pagsabot dili gayud kini matugkad. Apan pinaagi sa gahom sa Ginoo, ang mga tunokon nga dalan makaya ra nato sa paglabang. Sama sa katilingban sa Sto. Rosario, Balinsuag nga wala lang damha nag saulog na sa ilang unang Kapistahan. Ato lamang hinumdoman nga modangop kita Kaniya, kay sa kanunay nagauban Siya kanato, uban usab sa pangama ni Birhen Maria, ang Rayna sa Santos nga Rosario.

Sa kanunay, Dalaygon ang Dios!

(Jozeil Comapas Crodua – Youth SocCom)