Pinakaunang PSSA Forum sa Arkidayosis sa Davao

“The Lord loves the sinner, but He condemns the sin. Pagkanindot sa gugma sa Dios, matag usa adunay luna sa kasingkasing sa Dios, maningkamot kita sa atong pag-journey sa kinabuhi sa pagpuyo sa pagkabalaan regardless of who we are, diha sa atong options ug choices sa kinabuhi, hinaot nga atong masunod ang plano sa Dios.” – Rev. Fr. Orlando A. Angelia, DCD

Niadtong ika-11 sa Setyembre 2022 gipahigayon ang pinakaunang Person with Same-Sex Attraction (PSSA) Forum sa tibuok Arkidayosis sa Davao didto sa San Miguel Parish Panacan isip inisyatibo sa San Miguel Parish Youth Apostolate (SMPYA) aron sa pagtaytay sa gintang sa mga miyembro sa LGBTQ+ ug sa Simbahan.

Uban sa temang, “I am meant for sainthood,” nahitabo ang “LGBT in the Eyes of the Church and in the Civic Society,” aron usab mahibaw-an ang sugyot sa mga kabatan-onang miyembro sa komunidad sa LGBTQ+ ug sa ilahang relasyon ug pagtan-aw sa Simbahan. “Kita ang mamahimo nga ehemplo o instrumento na mudasig sa atong kabatan-onan, na mudasig sa atong kaubanan nga mga LGBT,” matod pa sa Sangguniang Kabataan Chairman, Ryan Jay Calsa.

Diha sa pamulong ni LGBT Davao Coalition, Lead Convener, Rejie Boy Mingming, iyahang gitagaan og gimbug-aton ang ilahang tawag sa pagpasa sa SOGIE Bill, “This is the first time that we were invited sa ingon ani nga gathering sa sulod sa Church community. And we are very much excited to witness unsaon pagprocess later nga unsaon pag-bridge ang duha ka sector. Kay bisan asa aduna may LGBT, and bisan asa aduna puy Church community, and it’s a high-time sa pag-address sa issue sa sulod sa atong komunidad,” iyaha kining gipasabot sa tanan aron usab malamdagan ang mga dili miyembro sa ilahang ginapaglaban.

Naghatag usab og mas lawom nga pagpasabot si Michael Diacosta, ang kaniadtong Board Secretary LGBT Davao Coalition, Inc., Finance Officer of Olympus Society of Davao, Inc. Clinic Manager of Olympus Community Center. Sa unang parte, iyahang gipasabot kung unsa gayud ang SOGIE – Sexual Orientation Gender Identity Expression ug unsa usab ang depinisyon sa Sexual Orientation, Sexual Characteristics, Gender Identity, Sexual Preference, Sexual Orientation, ug uban pang mga pulong na gikalibogan pa sa uban.

“Once mag-connect ang Simbahan and LGBT Community, at least naay mag-remind nimo unsaon ang pagiging faithful. Ug hopefully, ma-strengthen ang relationship ni LGBT sa Church community kay para at least, mabawasan somehow ang sexual behavior sa usa ka member sa LGBT,” sugyot pa ni Diacosta.

Sa ikaduhang lat-ang sa Forum, naghatag usab si Rev. Fr. Orlando A. Angelia, Family and Life Apostolate Director, og usa pud ka pagpasabot para sa mga LGBTQ+ sa konteksto sa Simbahan.

“The Church is reaching out now. Mga igsoon, ayaw hunahunaa nga layo mo sa Simbahan kay kamo ang nagpalayo, usahay ang LGBT ang nagapalayo. Apan pasayloa pud ang ubang pari nga wala ni-follow sa heart of the Church. Because the heart of the Church must be patterned sa Gospel. Ana si Pope Francis, the heart of the Church is not to condemn anyone kay kitang tanan mga anak sa Dios, kitang tanan naga-journey aning kinabuhia, and usa ra atong padulngan – sa Ginoo,” matod pa kang Fr. Orly.

Naghatag usab siya og mga sitwasyon nga diin nakatabang sa mas pagpasabot sa panan-aw sa Simbahan sa komunidad sa LGBTQ+ ug ang pagpasabot usab sa kung unsa ang ginamithi sa maong komunidad sa Simbahan.

“Father, image pa ba ko sa Ginoo nga nakasala man ko? Ang image magpabilin, namanstahan apan magpabilin pa na, bisan unsa pa ang sala sa tawo, we remain to be an image of God. Apan ang likeness, is holiness of life, kana mawala kung makasala ta og mortal,” sugyot pa ni Fr. Orly.

Gitapos ang tibuok Forum sa usa ka kalihukan nga nahimong paagi sa usa ka open Forum gikan sa mga kabatan-onang miyembro sa LGBTQ+ ug sa pagtubag usab sa mga Resource Speakers dungag ni Warren Rex Bautista, usa sa Couple Adviser sa SMP Parish Youth Apostolate. Didto, napaminaw ang mga nagkadaiyang kasinatian ug mga panan-aw sa mga batan-on ug gitagaan og kalinaw ang ilahang mga sugyot nga maoy nakababag sa ilahang pakigrelasyon sa Simbahan mahitungod na pud usab sa mga diskriminasyon ug stereotyping sa ubang tawo. (Ma. Joneila Laruya)