Relikya ni San Juan Pablo II Gidawat Panahon sa Iyang Kapistahan

Ang ika-11 nga kapistahan sa parokya San Juan Pablo II, Los Amigos mas nahimong makahuloganon dili lamang tungod sa kalampusan sa mga gipahigayong aktibidad apan tungod sa usa ka espesyal nga hitabo. Kini mao ang opisyal ug katilingbanong pagdawat sa relikya sa maong patron sa parokya. Matod pa ni Fr. Russell Bantiles, kura paroko wala niya paabuta ang grasya nga makabaton sa maong gasa gikan sa Dios, apan miabot kini. Talagsaon gayud kini nga panghitabo nga ang usa ka parokya makadawat ug susamang relikya labaw pa nga kini buhok sa maong patron.

Ang mga parokyano human sa alas sais sa buntag nga Pontifical Mass, dayon nga mihatag dinha sa ilang pagtahod sa maong relikya ug naghalad sa ilang mga panalangin. Dako ug pasalamat ang mga katawhan sa nahimong instrumento niining dakong kalipay sa parokya nga mao si Neil Christian Sator gikan sa parokya San Antonio de Padua, Agdao. Matod pa ni Neil naggikan ang maong relikya kay Cardinal Stanisław Dziwisz, personal nga sekretarya sa maong santos ug ang papeles sa relikya, gilihok ni Fr. Carlos Martins.

Dakong grasya ang mibubo sa mga parokyano sa San Juan Pablo Dos niadtong Oktubre 22 ug dako ang ilang paglaom nga sa umaabot mahimo kining shrine. Sa pamalandong ni Most Rev. Romulo Valles, DD iyang gihatagan ug bili ang pagkinabuhi ni San Juan Pablo Dos nga nagpakita sa konkreto nga pamaagi kung unsa ka kuwang ang kinabuhi kung wala ang Ginoo.