Mga Deboto ni San Francisco: Mapaubsanon

Malipayong gisaulog sa mga parokyano sa Tagakpan ang ika-23 nga kapistahan sa San Francisco de Asis Parish niadtong Oktubre 4, 2022 adlawng Martes. Ang alas 6 y media nga misa gipangulohan ni Abp. Romulo Valles, D.D., ang Arsobispo sa Davao. Ang tema sa kapistahan karong tuiga, “San Francisco de Asis: Atong Kauban sa Pagkaplag og paglaum, Taliwala sa Pag-antus.”

Ang Santos nga Misa gitambongan usab sa mga kaparian sa Oblates of Saint Joseph-Philippine Province, kauban ang ilang Provincial Superior, Rev. Fr. Jayson Endaya, OSJ. Ang ika-23 nga kapistahan sa San Francisco de Asis Parish – Tagakpan mao ang unang kapistahan sa mga bag-ong pari nga na-assign sa Parokya nga sila Rev. Fr. Mario Holmina, OSJ, ang Kura Paroko, ug si Rev. Fr. Dennis Venus, OSJ.

Nahimong malampuson ang kapistahan tungod sa pagpaningkamot sa mga kaparian, mga pangulo, ang katilingban ilabi diha sa ilang preparasyon sa maong kapistahan og Novena mass, diin makita ang pagtinabangay ug pagtinambayayongay.

Sa homiliya, gitagaan og duot ni Abp. Valles ang mga hiyas ni San Francisco de Asis. Matud pa niya, ang pagsaulog sa kapistahan ni San Francisco usa ka nindot nga pahinumdom nga ang tatak sa mga deboto mao ang pagkakabus ug pagkamapaubsanon.

Matud pa ni Rizamarie Delda, usa sa mga miyembro sa LCCP, memorable ang kapistahan karong tuiga tungod kay usa kini ka-full blown fiesta pagkahuman sa duha ka tuig nga adunay restrictions tungod sa pandemya. Dugang pa niya, ang kapistahan ni San Francisco de Asis nagpahinumdom usab sa atong pagsaulog sa atong pag-survive sa pandemya.

Mapasalamaton ang tanan sa kalampusan sa kapistahan ni San Francisco sa Tagakpan karon tuiga. Uban sa pag-ampo ug pagsalig diha sa Ginoo, nagalaum ang mga parokyano sa Tagakpan sa padayon nga pagbubo sa grasya, giniyahan sa patron nga si San Francisco de Asis. (SFDA SoCCom)