Father of 3

Dear Ate Emz,

I am a Father of 3, puro panganay. Yes, angkunon ko akong mga kasaypanan kaniadto. Tungod kini sa akong walay pagpakabana ug walay tarong panghuna-huna. Das-das ke das-das ug walay kahadlok o kabalaka sa kung unsay dangatan. Ang akong mga anak tua sa ilang mga inahan ug gihikaw kanako kay tungod sa akong pagka iresponsable. Wala man gud akoy saktong pagkakitaan. Dili pud sila uyon nga anaa sila sa akoa kay basin kuno akoa lang mapasagdan. Sakto man sila sa ilang desisyon kay dili gayud ako angayan.

Sa pagka karon ako nag inusara sa kinabuhi bisan akong mga immediate family nahiubos sa akong nahimo. Wala na akoy nawong ika atubang sa mga tawo nga nakaila kanako labaw na sa Diyos tungod sa akong mga salaud. Unta mapasaylo ako sa akong mga kadaut nga nabuhat. Mga tawo nga akong nahasol ug napasakitan gumikan sa akong pagka dili angayan.

Paningkamutan ko nga mubawi sa akong mga pagkulang. Unta dili paulahi ang tanan. Hinaut pa unta.

Daghang salamat sa higayon sa pagpaambit,
Billy

* * * * * *

Dear Billy,

Subo kaayo pamalandongon nga tungod sa pagkabatan-on, kusog kaayo ang adventurous nga kinaiya ug mga immature nga mga desisyon sa kinabuhi. Mahimutang nga nahimong irresponsible ang mga buhat ug wala na nagpakabana kung unsay dangatan. Sa ingon ani nga mga buhat, ang pinaka luoy mao ang mga bata nga magtubo nga wala ang amahan sa ilang kiliran. Kini nga sitwasyon kasagaran mo resulta sa mga bata nga naay mga behavioral problems. Maayo lang kung ang ilang mga inahan naay support system nga motabang nila sa pag-amuma sa mga anak.

Sa imong kabahin, subo sab kaayo nga naa kay 3 ka anak apan bisan usa wala sab sila sa imong kiliran. Ug nagatoo ako nga sa paglabay sa panahon makaamgo gyud ka sa mga kasaypanan nga imong nabuhat. Usa sab kini ka gasa ang gihatag sa imo sa Ginoo nga maka realize ka na sa imohang mga kasaypanan sa kinabuhi.

Ang panahon karon usa ka gasa nga gitanyag sa imo sa atong Ginoo aron mobalik ka sa Iyahang sabakan. Pagbuot Niya nga dili ka hangtud sa hangtud magpabilin nga iresponsable nga pagkatawo. Naghatag gyud ang Ginoo og higayon nga ang usa ka tawo magbag-o. Ang pagdawat sa imong mga kasaypanan usa na kini ka lakang dinha sa dalan sa pagbag-o. Hinaut unta kining bag-ong dalan na ang imong sundan ug mamahimong lig-on ang imong pagsalig sa Ginoo nga ubanan ka Niya sa imong paglawig niini.

Kinasingkasing nga pagpailob, usa ka hagit sa imo ang sinsero nga pagpangayo og pasaylo sa mga tawo nga sumala sa imoha, imong gipasakitan ug gihasol. Mao kini ang usa sa mga dapat buhaton ug nasayod ako nga dili kini sayon. Apan kung tinuod gyud ang imong pagmahay, kinahanglan nga naa kay kaisog ug pagkamapaubsanon nga attitude aron mahimo nimo ang pagpangayo og pasaylo. Ang hugot nga pag-ampo ug panghangyo sa Ginoo nga ihatag kining mga gasa sa pagpailob ug kaisog, maoy makatabang nimo. Ang tinuod nga paghinulsol sa mga kasaypanan dili lang magpabilin dinha sa hunahuna apan ma hubad gyud sa aksyon.

Hagit sab kanimo ang pagbalik sa sabakan sa Ginoo pinaagi sa sakramento sa pakig-uli sa Iyaha, sa pagkumpisal aron makabaton ka sa grasya sa pagpasaylo sa atong Ginoong Hesukristo. Ang hagit mao ang pagampo, ang penitensiya, ug ang paghatag ug tabang alang sa mga nanginahanglan. Dinha sa paghiusa sa atong Ginoong Hesukristo nga nagpas-an sa krus alang sa atong kaluwasan, hinaut unta nga imo sab pas-anon ang imohang mga pag-antos nga mahilayo sa imohang mga anak, ihalad kini alang sa kapasayloan sa imong mga sala ug mga kalapasan.

Sa kasamtangan, ayaw lang undangi ang pagpakita sa imong mga anak nga nagbasol ka. Kung naay mga higayon, makigpulong ka aron mulambo ang inyong relasyon bisan dili pa gyud kamo magkita sa personal. Do positive actions bisan pa makadawat ka og rejection sa pagkakaron.

Tinuod, ang tanan gihatagan og second chances. Sa imohang kabahin, paningkamot lang gyud nga makapangita ka og panginabuhian aron makabawi ka ug mahimong responsableng tawo ug amahan. Ang tanan naay room for improvement. Prove to yourself that you are more mature and more responsible now and you have grown because of these mistakes in the past. Labaw sa tanan, ayaw biyae ang kinabuhing mainampuon, hugot nga pagsalig sa Ginoo nga dili ka Niya pasagdan, apil na ang imong mga mahal sa kinabuhi.

Praying for your successful journey towards growth and change.

God bless you more.
Ate Emz