Tumong sa Kapistahan: Pagdawat sa Maayong Balita

Malampusong gisaulog sa Parokya sa St. Mary of the Perpetual Rosary, Buhangin ang ika-36 nga kapistahan kaniadtong Oktubre 02, 2022 uban sa tema: “Simbahan nga Nagapanaw isip mga Piniyalan, Gisangunan sa Pagsangyaw sa Maayong Balita sa Kaluwasan uban ni Santa Maria sa Kanunay’ng Pagrosaryo.”

Ang Pontifical Mass gipahigayon sa alas 10:00 sa buntag diin gipangulohan ni Most Rev. Romulo G. Valles D.D. inubanan ni Msgr. Jaime Gamboa ug gikonselebrar sa Kura Paroko, Rev. Fr. Dionisio C. Tabiliran ug Resident Priest, Rev. Fr. Romeo T. Coronel, OSA.

Malipayon ug mapasalamaton si Archbishop Valles sa imbitasyon nga makasaulog sa Santos nga Misa ug makaduyog sa Kapistahan ni Santa Maria sa Kanunay’ng Pagrosaryo.

Gipaambit sa Arsobispo ang panultihon nga “To Jesus through Mary” diin pinaagi sa Santos nga Inahan kita nadala ngadto kang Hesus. Gipadayag usab sa atong halangdon nga Arsobispo nga ang tumong sa pagsaulog sa Kapistahan mao ang pagdawat sa Maayong Balita.

Sumala pa ni Archbishop Valles adunay tulo ka mga pamaagi aron mapalawom ang atong pagtuo ngadto sa Dios.

Ang una niini mao ang ‘Check Your Faith’ diin atong tan-awon ang atong huna-huna ug kasing-kasing. Kini usab gikonekta sa Unang Pagbasa gikan kang Propeta Habakuk diin sama kanato siya nagbagol-bol ug nangutana kung nganong wala mitabang ang Ginoo sa mga problema ug kalisud sa kalibutan. “Check your brakes, check your faith. The rushed one has no integrity but the just one, because of his faith, shall live.” Mahimo unta kitang sama kang Propeta Habakuk nga sa katapusan taliwala sa mga kalisod, nagpabiling matuohon ug masaligon sa Ginoo.

Ang ikaduha mao ang ‘Stir into Flame’ gikan sa Ikaduhang Pagbasa gikan sa Ikaduhang Sulat ni San Pablo ngadto kang Timoteo. Dinhi gipahinumdoman ni San Pablo si Timoteo nga kinahanglang pagabantayan ang gamay nga init o baga sa pagtuo aron kini kanunay nga magsiga. Ang atong regular nga pagsimba, paglihok alang sa kaayuhan sa tanan ug ang pakiglambigit sa mga kalihukan nga makapalawom sa atong pagtuo maoy pipila sa mga gabayan aron dili mapalong ang kalayo sa atong pagtuo.

‘Perpetual Rosary’ mao ang katapusan nga pamaagi. Gipunto sa arsobispo nga ang kadaghanang Misteryo sa Santos nga Rosaryo anaa sa bibliya. Dungag pa ni Archbishop Valles nga dako ang tabang sa pag-ampo sa Santos nga Rosaryo sa pagpalawom sa atong pagtuo. Gitapos ni Archbishop Valles ang iyang homiliya sa pag-ingon nga si Maria ang atong inspirasyon ug gabayan ngadto sa Ginoo.

Mapasalamaton ang Kura Paroko nga si Fr. Dionisio Tabiliran duyog nila Fr. Romeo Coronel, Fr. Boy Roland Ong ngadto kang Archbishop Romulo Valles, Msgr. Jaime Gamboa, GKK Servant Leaders, mga parokyano nga sakop sa SMPRP sa pagduyog sa selebrasyon sa Kapistahan ni Santa Maria sa Kanunay’ng Pagrosaryo.

Pagkahuman sa Pontifical Mass adunay programa ug fellowship lunch nga gipahigayon sa Parish Gym diin gitambongan sa mga GKK Servant Leaders sa napulo ka mga Sona. Gisugdan ang programa pinaagi sa Opening Prayer/Song nga gipangulohan sa St. Mary Youth Choir. Adunay parlor games alang sa mga hamtong ug kabataan. Nagpasundayag usab ang mga PSP, animators, ug ang Zones 5 & 7 ug Zones 1 & 3 nga maoy mananaog sa gipahigayon nga Masaligon ug Matuohong Katawhan uban ni Santa Maria (MAKASAMA) Festival kaniadtong Oktubre 01, 2022. Adunay community dancing nga gipangulohan sa mga parish youth animators ug gihuman ang programa pinaagi sa panalangin nga gipangulohan ni Fr. Romeo Coronel.

Viva MARIA!

(Allyza Hope Tabigue, GKK SoCCom | Photos: Hermie Mapute)