Sr. San Lorenzo Ruiz Sumbanan sa Tiunay nga Pagkapiniyalan

Septyembre 22, 2022 gisaulog ang kapistahan sa GKK Sr. San Lorenzo Ruiz KTC nga gitimbaya pinaagi sa pagpasalamat sa mga grasyang nadawat diha sa santos nga misa sa alas nwebe sa buntag. Tungod ang maong kapilya ilawom man sa parokya sa San Roque Malabog, si Reberendo Padre Arnold Balaquinto maoy nangulo sa maong misa.

Uban sa tema, “Sr. San Lorenzo Ruiz sumbanan sa tiunay nga pagkapiniyalan,” sumala sa homiliya ni Fr. Arnold, kinahanglan ang mga GSL ug myembro sa katilingban magkahiusa ug magtinabangay aron mas molambo pa ang maong kapilya. Human sa santos nga misa nabunyagan ang usa ka bata ug dakong pasalamat sa PSK kon Pangulo sa Katilingban nga si Avelina Perez nga nagmalampuson ang pagsaulog sa kapistahan bisan tuod usa ra ang nabunyagan. Human sa paniudto nagpahigayon ug basketball game kauban si Fr. Arnold Balaquinto ug ang parish staff kontra sa mga GSL kon Pangulo sa Liturhiya sa Sona 4. Pagtungtong sa ala sais sa gabie, nagpahigayon usab ug Ramp Modelling sa mga kabataan, nga nahuman sa alas dyes sa gabii. (Gina M. Solatorio – GKK SocCom, San Lorenzo Ruiz KTC | Photos: Imelda C. Overiz)