Mabugnawng Kapistahan Sa San Miguel Parish Marahan

Gisaulog sa mga parokyano sa San Miguel Parish Marahan duyog ang ubayubay pud nga mga bisita gikan sa nagkalainlaing mga parokya ang ilang ika deci-ocho nga parochial fiesta niadtong miaging Dominggo Septyembre 25.

Nakurat na lamang ang mga katawhan tungod dunay usa ka dakong bus nga puno sa mga maestrog, maestra ug uban pang mga office staff sa eskwelahan sa Holy Cross of Davao College Inc. Gani duyog kanila ang ilang President nga si Br. Noelvic H. Deloria, SC ug ang ilang Vice President for Academic Affairs nga si Dra. Teresa P. Fabiania. Kini tungod sa nahitabong MOA signing tali sa pagtinabangay sa tulonghaan ug sa parokya sa nagkalainlaing mga pormasyon nga gikinahanglan sa mga parokyano ug sa mismong parokya. Ang eskwelahan nangita ug parokya nga nanginahanglan dinha sa suporta dili lamang sa tabang pinansyal apan sa mapadayunong mga pormasyon. Ang San Miguel Parish tuod naglangkob man sa mga Indigenous Peoples tungod nahimutang kini sa mga bukid nang dapit sa dakbayan.

Ang Ponitifical Mass nagsugod sa alas nwebe sa buntag kauban ang arsobispo sa Dabaw Most Rev. Romulo G. Valles, DD. Bisan paman sa makusog ug mabugnaw nga hangin nagpabilin ug nagpadayon ang mga katawhan sa pagapil sa santos nga misa. Gani ug paminawon sa likod nga bahin sa gawas sa parokya dili na madungog kaayo tungod kulang ang speakers sa palibot. Kini ug daghan pang mga kakulangan ang kinahanglan sa parokya apan wala mahadlok ang ilang kura paroko nga si Fr. Felix Bontog, MJ tungod sama sa gikaingon ni Archbishop Valles, ang mata sa Ginoo anaa kanunay kanato ug nagpasabot lamang kini nga dili Niya pasagdan ang Iyang simbahan.

Usa ka timaan ang maanindot ug bag-ong tukod nga adoration chapel ibabaw sa simbahan. Gamay lamang kini apan dako nang tabang dili lang sa mga duol kun dili labaw pa sa mga mahisalaag niadtong dapita nga uhaw sa presensya sa Dios.