Altar Servers Investiture, Renewal ug Sending Forth Gipahigayon

Gipahigayon ang investiture, renewal ug sending forth sa mga Altar Servers sa St. Mary of the Perpetual Rosary Parish (SMPRP) kaniadtong Septyembre 11, 2022 sa alas 8:00 sa buntag nga Santos nga Misa.

Si Rev. Fr. Romeo Coronel, OSA, Guest Priest sa SMPRP maoy nangulo sa Santos nga Misa diin sulod niini gihimo ang pagpanalangin sa mga altar servers. Kasamtangan adunay kapin 50 ka mga altar servers sa parokya diin nadungag pa ug 19.

Adunay mga qualifications sa pagka-altar server sa SMPRP ug kini mao ang mga lalaki nga nag edad 9-18 ka tuig ug nakadawat na sa ilang first communion. Nagkinahanglan usab sila nga moapil sa regular nga mga practice ug meeting sa parokya aron sila ma send forth.

Isip pagpangandam sa renewal ug sending forth sa mamahimong altar servers, gipahigayon kaniadtong Hulyo 16, 2022 ang recollection alang kanila diin si Sir Meds Abogado ang resource speaker.

Matod pa ni Jespert Pabilic, ang head sa mga Altar Servers sa SMPRP nga ang misyon nila mao ang mapaduol ang mga kabatan-onan sa Ginoo ug usab mahilayo sila sa dautang mga elemento.

Dungag pa ni Jespert nga ilang paningkamutan nga magpabiling aktibo ang ilang ministriya pinaagi sa pag-elect ug bag-ong mga opisyales ug sa pagpahigayon og regular nga Bible study ug Bible sharing matag bulan aron maila pa gyud nila kung kinsa ang ilang giserbisyohan.

Ang maong investiture, renewal ug sending forth gitambongan usab sa mga ginikanan sa mga kabataan isip pagsuporta sa bag-ong ministriya sa ilang mga anak. (Allyza Hope Tabigue, GKK SoCCom | Photos: Jespert Pabilic)