Hadlok Nakong Musugal Sa Gugma

Dear Ate Emz,

Tuguti ako nga magpaambit sa akong kaagi nga unta mahatagan ug katin-awan o mga tambag kung unsay akong angayang buhaton. Nagpuyo ko kining dakbayan, partikular sa Boulevard, 35 years old na po ako ug aduna koy ka live-in partner, ug 10 years na kaming nag-uban.

Nagdesisyon ang akong partner na mo abroad kay aron lagi muasenso man lang among kinabuhi una kami magpakasal. Milabay ang pipila ka mga katuigan, nasakpan nako akong partner nga duna diay siyay kapuyo didto sa laing nasud. Nagsakit jud akong buot atong panahona pero kay gimahal man nako siya pag ayo gipasaylo nako siya, gipalabay ko lang ang mga panghitabo. Apan sulod lamang sa mga pipila ka bulan nabuhat kini niya pag-usab. Niadtong panahuna nakapangutana ako sa akong kaugalingon ug, Ginoo! Unsa man jud akong dakong sala nga nabuhat ug nganong nahitabo man kini sa akoa.

Tungod sa mga nahitabo, nalihis ang akong dalan ug wala na namao. Murag wala nay bili ang akong kinabuhi. Gisudlan ko ang mga hiwi nga mga binuhatan. Milungtad sab kini ug pipila ka mga bulan.

Maayo na lang anaa ang akong pamilya ug mga barkada nga kanunayng andam nga mutabang aron ako maka recover sa kasakit nga akong nasinati. Nahiduol ako pag-ayo sa Ginoo. Nakat-on ako sa pag-rosaryo. Nindut ug maayo na pud akong tinagdan sa ubang tao. Salamat sa Dios kay naka get over ako.

Milabay ang pipila ka tuig, Aduna akoy na ila-ila nga usa ka maanyag nga babaye. Buotan og relihiyosa. Wala madugay nahulog akong loob kaniya ug siya usab nganhi kanako. Nabalaka ako ug basin akong ipadayon ang akong gibati ngadto kaniya basin mahitabo na sab ang akong nasinati kaniadto. Angkonun ko nga na trauma gayud ako sa mga nangaging panghitabo. Unsa man ang angay kong buhaton?

Nagpapasalamat,
Roy

* * * * * *

Dear Roy,

Salamat sa pagpaambit sa imong kasinatian, nahibalo ako nga daghan ang maka relate ani. Subo kaayo ang mga panghitabo labi na nga dugay na kaayo mo nga nag-uban sa imong partner.

Dili lalim ang kinabuhi didto sa laing nasud nga malayo sa mga mahal sa kinabuhi. Kasagaran makasinati gyud og kamingaw. Kung dili lig-on ang imong kaugalingon, dili gyud ka makalahutay ug magpabilin nga emotionally and psychologically healthy. Mao nga ang ubang mga Pinoy nangita gyud og mga kapwa Pinoy aron ma maintain ang ilang “sanity”. Dili gyud kalikayan nga mahulog sa tentasyon ang uban nga magkaroon og relasyon aron naa silay emotional support. Lahi ra gyud ang mahimo sa personal nga interaction kaysa virtual nga komunikasyon. Naay uban nga ang adlaw- adlaw nga mga video chats sa ilahang pamilya igo na aron makaya nila ang separasyon. Apan naa pud mga uban didto nga medyo mahuyang. Mao gyud kini ang risgo nga atubangon sa atong mga kababayan didto. Masukod gyud ang TRUST o pagsalig sa usag-usa kung LONG DISTANCE RELATIONSHIP (LDR) ang sitwasyon.

Sa imong kabahin, Roy, masabtan nato ang imong temporaryong “paglihis” sa imong dalan, resulta sa kasakit nga nasinati. Apan taliwala niini masulti nato nga pinangga gyud ka sa Ginoo kay wala gyud ka Niya gipasagdan. Ang tinuod nga mga higala naa gyud modamay sa imong kahimtang ug maningkamot nga agakon ka hangtud nga makabangon ka sa sakit nga imong nasinati. Labaw sa tanan, naa gyud kanunay ang kaugalingong pamilya, panahon sa kasakit o kasadya, makasalig gyud ka sa ilang emotional ug psychological support. Dinhi nimo masinati ang pag-atiman sa Ginoo kanimo ug timailhan lamang nga pinangga gyud ka Niya.

Salamat nga imong gitubag ang panawagan sa Ginoo nga mobalik ka sa Iyang sabakan. Gikan sa imong pagdawat sa Iyang gasa, wala na gyud ka Niya gibuhian hangtod nga maduol ka pa Kaniya sa hingpit. Sa imong pagsunod sa Iyang pagbuot, gihatagan ka pa og bag-ong higayon nga mahigugma usab, ug ang gihatag Niya kanimo usa ka babaye, nga sumala sa imoha, buotan ug relihiyosa. Unsa kaha ang mensahe ni Lord ngano kining babaye ang gihatag sa imoha? Sa iyang pagka relihiyosa, makasulti kita nga kining sitwasyon gusto na sa Ginoo nga mosubay ka na sa Iyahang kabubut-on nga naa Iyahang BLESSING ug Siya ang mahimong sentro sa inyong relasyon kung mahitabo nga imong ipadayon kini. Kung imong sundon ang pagbuot sa Ginoo, dili gyud puede ang live-in status, busa, usa kini ka hagit sa pagbag-o sa dalan nga imong subayon. Sa kining dalan, ang gasa sa Ginoo makanunayong mugiya kaninyo ug ang mga kahadlok, ang trauma, ang pagduha-duha, etc., mamahimong mapulihan og kaisog, pagsalig, kalig-on ug tinuod nga gugmang naka sentro sa Ginoo. Ang Sakramento sa Kasal maoy tinubdan sa gasa sa Ginoo aron ang mag-tiayon malig-on sa mga sinumpaan ug commitment nga magpabilin kining gugma hangtod sa kamatayon… “till death do us part”.

Hatagi ang imong kaugalingon og panahon sa pag-ampo aron malamdagan ka sa Espirito Santo, kauban ang atong Mahal na Inahan, sa pagbag-o sa dalan ngadto sa tinuod nga Gugma og walay lain…ang atong Ginoo mismo. Padayon sab ug duol kay Mama Mary, pinaagi sa pagrosaryo kay mao gyud kini ang usa ka makapahimuot sa Iya og sa atong Ginoong Hesus.

God bless you more.
Ate Emz