Ang Mapasalamaton nga Samarianhon

Ika-28 nga Domingo sa Ordinaryong Panahon (October 9, 2022)
1 Hari 5:14-17 / Salmo 98:1, 2-3ab, 3c-4 / 2 Timoteo 2:8-13 / Lucas 17:11-19

Niining ikakawhaag-walo nga Dominggo sulod sa Ordinaryong panahon, gidapit kita sa Dios nga kanunay kitang magmapasalamaton diha sa mga gasa nga atong nadawat matag-adlaw sa atong kinabuhi. Ang atong ebanghelyo karon diha sa sulat ni San Lukas nagsaysay kanato mahitungod sa mga sanlahon nga gi-ayo ni Hesus ug gipanalanginan aron sila mahibalik sa ilahang hustong panglawas. Ang maong mga sanlahon nahinloan pinaagi sa grasya ug kalooy sa Dios. Sa pagkahibalo nga sila naayo, ang usa kanila mibalik aron magpasalamat sa Dios.

Sa ebanghelyo, usa lamang ka sanlahon ang mibalik kang Hesus ug miingon sa pulong nga “salamat”, kini usa ka Samarianhon nga sanlahon. Ang nakadani o nakahatag og atensyon kang Hesus mao gayud ang kamatuoran nga usa lamang ka sanlahon gawas sa napulo ang mibalik kaniya aron ipadayag ang kinasingkasing nga pulong pasalamat. Kini nagapahinumdom kanato sa kanunay kung unsa ka bililhon o kamahinungdanon ang hiyas sa pagkamapasalamaton. Ang dakong pagtuo sa naayo nga sanlahon maoy nakaluwas kaniya.

Sa panahon ni Hesus ang mga tawo nga adunay sakit nga sanla kinahanglang mobulag sa iyang kaugalingon gikan sa katilingban ug mopuyo sa gawas sa lungsod nga mag-inusara, ug ipadayag niya sa kadaghanan nga siya “hugaw” nga tawo. Ang maong sakit nga sanla gipakasama sa sala. Sumala sa panghunahuna niadtong panahona, gisilotan gayod sa Dios ang makasasala pinaagi sa pisikal nga sakit nga iyang nadawat.

Sa atong kinabuhi aduna usab kitay ginaingon nga espirituhanong sanla. Apan kining maong sanlaha si Hesus lamang ang makahatag og kahupayan ug kaayohan. Pinaagi sa sakramento sa kumpisal kita mahibalik diha sa husto ug maayong panglawas gikan sa spirituhanong kasakitan. Ingong mga Kristohanon, angay natong mabatonan sa atong kinabuhi nga kita kinahanglan nga mamahimong magmadasigon sama sa panglantaw sa napulo ka mga sanlahon sa dihang ilang gilantaw si Hesus nga maoy makahupay sa ilang mga kasakitan.

Sa katapusan, angay kitang magpasalamat sa Dios sa tanang mga gasa nga atong nadawat. Ang hiyas sa pagkamapasalamaton maoy dalan paingon diha sa gingharian sa Dios. Usahay diha sa atong kaugalingon, sa sobrang kasadya pinaagi sa mga kalibutanhong butang, mahikalimtan nato ang magpasalamat sa Dios. Mga igsoon, angayan lamang natong sundon o buhaton ang gibuhat sa maong Samarianhon nga sanlahon nga mibalik aron kinasing-kasing nga ipadayag ang iyang dakong pagdayeg pasalamat sa Dios. Ang mga tawong mapasalamaton sa kung unsay ilang nadawat gikan sa Dios, mao usab kadtong mga tawo nga madasigon ug maisogon nga andam ihalad ang tibuok kinabuhi ngadto sa Dios ug sa iyang isigkatawo. (Bro. Julius Lugay)