Pujada Bay Ug Mt. Hamiguitan Gipanghinaotan Nga Protektahan

Duyog sa panghinaot sa mga taga Davao Oriental nga gipanghunahan mismo sa Dayosis sa Mati pinaagi sa pangulo ni Most Rev. Abel Apigo, DD nga protektahan ang tibuok probinsya labi na ang mga naapil sa UNESCO World Heritage sites sama sa Mt. Hamiguitan ug Pujada Bay gipahigayon ang usa ka open forum nga apil sa mga pipila na ka lakang sa maong tumong.

Kauban niini nga duso ang Ateneo de Davao University nga nanimbasog sa pagpalanog sa dili maayong epekto sa pagmina. Kini nga tumong dili lamang tungod sa dungog nga madawat tungod niining mga nindot nga dapit apan labaw pa ang pagprotekta sa mga katawhan labi na sa mga umaabot pang katuigan.

Ang pagkahugaw sa tubig tungod sa mina maoy nakapahatag ug kakulba dinha sa mga lumolupyo tungod basin sa umaabot wala na silay limpyong tubig nga mainom. Sa pakighinabi nga nahitabo adtong adlawng Martes, Septyembre 27, daghan ang nadismaya nga mga lumulupyo tungod walay mga nangapil nga kadagkuan sa lokal nga panggamhanan. Tuod man makasubo kini apan kinahanglan mahibaw-an sa tanan ang kadugay ug kataas niining proseso sa pagpaundang sa pagmina apan kanunay ang mga katawhan nga milangkob ug nagpaluyo niini nga proyekto, dili muundang hangtod nga dili kini matagaan sa solusyon.

Tungod kita ang mga piniyalan sa kinaiyahan dili kita magpaka-buta bungol sa kasamtangang kahimtang.