Bokasyon sa Pagka-piniyalan Gilusad

Pormal nga gilusad sa unang Dominggo sa bulan sa Septyembre, ang pag-abli sa Bulan sa Bokasyon ang tawag sa pagka-balaan sa mga parokyano sa Ascension of the Lord ubos sa programa sa Pagka-Piniyalan.

Atol sa alas-5:30 sa buntag nga Santos nga Misa, giablihan ang tarpaulin sa usa ka tuig nga selebrasyon sa Stewardship of Vocation nga gipanguluhan ni Reb. Padre Zenon B. Ampong, kura paroko.

Naghulagway kini sa nagkalainlaing mga pamaagi ug papel sa matag binunyagan nga Kristyanos gikan sa Septyembre 2022 kutob Agosto 2023 sa pagtubag sa tawag sa relihiyoso nga kinabuhi, kinabuhi sa minyo, ug single blessedness.

Naghisgot usab si Fr. Ampong mahitungod sa katuyuan nga nakabutang sa tarpaulin sa alas 7 ug alas 9 nga Santos nga Misa ug gidapit ang tanan sa pagpakig-ambit sa mga binulan nga mga kalihukan sa parokya.

Ang paglusad sa Ascension of the Lord Parish sa usa ka tuig nga Vocation Awareness Campaign mao ang pagpahat sa binulan nga pagtutok sa iyang liturhikanhon nga mga kasaulogan ug mga intensiyon.

Gidapit niini ang tanan sa pag-ampo sa Santos nga Rosaryo, pagbisita sa Blessed Sacrament, paghalad ug mga Santos nga Misa, pag-ampo sa nobena sa Mother of Perpetual Help, pag-ampo sa 3 o’clock Prayer ngadto sa Diyosnong kalouy ug novena sa Sacred Heart, St. Joseph, Immaculate Heart of Mary ug uban pang mga debosyon ug pag-ampo alang sa kapahulayang dayon sa mga kalag ug mga mipanaw nga mga minahal sa kinabuhi.

Ang pagka-disipulo ug piniyalan usa ka bokasyon ug gitawag ang matag usa nga mamahimong kabahin sa maong kampanya.

Sa homiliya ni Fr. Zenon, iyang gipasabot nga sa pagsunod sa Ginoo, ang pagtubag sa tawag dili lamang sa buhat apan sa paghimo sa kaugalingon nga usa ka disipulo ni Kristo.

“A true disciple does his apostolate without the feeling of entitlement,” siya namahayag ug nagpasabot nga ang matuod nga disipulo dili maghimo sa iyang kaugalingon nga agenda apan himoong prayoridad ang agenda sa nagtawag kaniya.

Siya midugang nga mopa-ilawom ang maong disipulo sa proseso sa pagbag-o (conversion) gikan sa pagka-kalibutanon ngadto sa pagka-balaan.

Gilatad sa Santos nga Misa sa alas-7 sa buntag ang mga simbolo sa matag bulan nga selebrasyon sama sa Bibliya sa bulan sa Enero, Kasingkasing sa bulan sa Pebrero, Kababayen-an alang sa bulan sa Marso, Pakiguli sa bulan sa Abril, Flores de Mayo sa bulan sa Mayo, paghandom ug pag-ampo alang sa mga amahan sa bulan sa Hunyo, ug pag-ampo alang sa mga edaran ug mga apohan sa bulan sa Hulyo.

Lakip usab sa kasaulogan sa Season of Creation giapil sa pagpakita ang mga timaan o simbolo sama sa: tanom alang sa pag-amuma sa kamugnaan ning bulan sa Septyembre; ang pag-ampo sa Santos nga Rosaryo sa bulan sa Oktubre, ang paghandom sa mga kalag sa mga mipanaw na sa bulan sa Nobyembre ug ang pagpaambit sa gahom ug kalumo ug pagkamapasalamaton sa bulan sa Disyembre.