Matuod ang Tinun-an nga nahigugma kang Kristo

Ika-23 nga Domingo sa Ordinaryong Panahon (September 4, 2022)
Wis 9:13-18B / Ps 90:3-4, 5-6, 12-13, 14 AND 17 / Philemon 9-10, 12-17 / Luke 14:25-33

Ang matuod nga gugma nagagikan sa Dios nga mao ang gugma. Ang atong Ginoo nagpahinumdom kanato nga dili kita mahigugma pag-ayo sa atong pamilya, bahandi, ug sa atong kaugalingon labaw kay Kaniya. “Kon kinsa ganiy moanhi ngari Kanako ug dili mahigugma Kanako labaw pa sa iyang amahan, inahan, asawa, mga anak, mga igsoong lalaki, ug mga igsoong babaye, bisan gani ang iyang kaugalingong kinabuhi, dili siya mahimong akong tinun-an.” Kini usa ka paghulagway nga ang atong paghigugma sa Dios molabaw gayod kaysa tanan, ang gugma nga maoy magdala kanato sa gingharian sa langit. Kini nga matang sa paghigugma dili sayon nga kab-oton, tungod kay kita kanunay nga mahigugma sa mga butang nga makapahatag kanato ug kalipay apan kalipay nga molabay lamang ug mahanaw. Si Kristo, ang matuod nga kalipay, mao unta ang atong tinguhaon sa atong kinabuhi. Ang pagsentro sa atong kinabuhi ngadto Kaniya maoy labing importante nga mahimo nato. Kon atong himoon nga haligi si Kristo diha sa atong kinabuhi ang tanan nga mga kalibutanong mga bahandi mahimong makahuloganon diha sa atong panaw padulong Kaniya.

Tungod kay si Kristo gugma, ug ang timaan sa gugma mao ang pagsakripisyo, kinahanglan nga kita kanunayng andam sa pagpas-an sa atong krus. “Kinsa ang dili mopas-an sa iyang krus ug moanhi sunod kanako dili siya mahimong akong tinun-an.” Ang pagpas-an sa krus usa ka hagit nga angay natong batunan sa tanan natong pagkinabuhi. Apan unsa ang gipasabot ni Kristo kabahin sa pagpas-an sa krus? Kini mao ang paghigugma pinaagi sa pagsakripisyo. Ang pagpas-an sa krus mao ang atong pagsulay sa pagsulod sa masigpit nga dalan. Ang dalan nga diin gamay lang ang naninguha sa pag-agi. Ang dalan nga naghulagway sa paghigugma sa wala gayoy pagpihig bisan niadtong mga tawo nga wala mahigugma kanato, ni niadtong mga tawo nga naghatag kanato sa kasakit, kapait ug kabug-at sa atong palas-onon.

Sa katapusan, ang Ginoo nahigugma sa tanan. Siya nagpadan-ag sa adlaw sa tanan nga mga bihuhat. Siya wala gayod magdumili sa pagpadagayday sa iyang naghingapin nga mga grasya. Mao usab kini ang atong kinahanglang buhaton isip mga tinun-an sa atong Ginoo. Apan mabuhat lamang nato kini kon kita mahimong iyang matuod nga tinun-an, andam mopas-an sa krus. Atong ipabati ang atong dakong gugma nga atong nadawat sa Dios ug himoon nato kini nga sumbanan sa atong paghigugma sa uban. (Bro. Soren Abellanosa)