Pagpangandam Isip Mga Piniyalan

Usa sa pito ka sakramento sa Simbahang Katoliko, ang Kumpirma nga magahatag kanato sa talagsaong gasa sa Espritu Santo ug maghimo kanatong lig-on diha sa atong pagpuyo isip mga magtutuong Kristyano nga sumusunod ni Hesus. Alang sa mga parokyano sa San Roque Malabog usa kini ka bililhong gasa ug kinahanglang madawat sa mga kabatan-onan. Tungod niini gipahigayon ang Sakramento sa Kumpirma atol sa kapistahan sa maong patron.

Nagmalampuson ang pagkumpirma sa 97 ka mga parokyano nga gisugdan pasado alas onse, human dayon sa Santos nga Misa. Kini gidumala ni Archbishop Romulo G. Valles, D.D., kinsa mipaabot sa iyang mensahe diha sa pagpahinumdom sa ilang mga gisaad panahon sa ilahang mga bunyag.

Kini nga hitabo suportado gayod ni Padre Arnold Balaquinto, Kura Paroko ug ang mga PSP o katekista nga gipangulohan ni Sis. Jennifer Arañez, nga maoy mga nanguna sa pag han-ay sa maong kalihokan sukad pa sa panahon sa katekesis.

Tungod sa kaamgohan nga anaa ang Ginoo sa kanunay andam modawat kanila, nagmalipayon ang tanang nakadawat sa sakramento. “I am very happy that I already receive the Sacrament of Confirmation, kay isa mani sa maghatag og kahulogan sa akong pagka Katoliko.”, mensahe ni Judeylyn Comapas Crodua, PSB og usa sa mga midawat sa Sakramento.

Aron mulambo isip mga binunyagan nga nag-alagad sa Ginoo uban sa mapadayunong pormasyon pinaagi sa Sakramento sa Kumpirma sila aduna nay takos nga kusog diha sa ilang pagpagamit sa ilang kaugalingon isip piniyalan ni Kristo nga magsangyaw sa maayong balita. (Joziel Crodua | SoCCom)