“Wala man gyu’y late vocation, it’s just God’s perfect timing…”

Sa adlawng Lunes, Agosto 29, singkwentay-sais na ka tuig ang mulabay sukad may giordinahang pari nga gikan sa Parokya sa Imaculada Conception, Peñaplata. Apan si Padre Jerick Asdang maoy kinaunhang pari nga maordinahan sa bag-ong istruktura sa kasamtangan nga simbahan. Gikalingawan siya sa pagtawag og “Sir” tungod siya usa ka Licensed Professional Teacher sa wala pa siya misulod sa seminary, ug siya karon maoy nagdumala sa San Lorenzo College of Davao sa Talomo duha ka tuig na ang kadugayon.

Niadtong Agosto 22, ato pud nasayran ang pag-ordina kay Padre Ranebe Magallanes nga iyang suod nga higala ug sa pagkakita ni Padre Jerick Asdang niini gibati siyag kalipay ug excitement nga sa musunod nga semana siya na sab ang makakab-ot sa iyang siyam ka tuig na paghandom.

Tuod man propesyonal na si Padre Jerick sa iyang pagsugod sa pormasyon, dili siya uyon sa kanhing termino nga late vocation. “As I see it wala man gyu’y late vocation, it’s just God’s perfect timing…”, kini nga mga pulong naghatag og kabug-aton nga angayang pamalandongan sa uban. Siya misugid nga ang tanang mga panghitabo sa atong kinabuhi dunay rason ug anaa sa dakong plano sa Ginoo alang kanato.

Nindot ang kasinatian ni Padre Jerick diha sulod sa iyang pamilya tungod sila kanunay dungan nga mag-ampo ug dugay nang nangalagad sa simbahan. Gani, dinhi nagsugod ang paglambo sa iyang mithi sa relihiyosong kinabuhi.

Sa pangutana kung unsang gasa ang iyang ikaambit sa katilingban, mibungat lamang siya sa mubo apan bug-at nga pulong, ang iyang kaugalingon. Tuod man ang gasa sa pagka-siya dako nang grasya sa katilingban dili lang tungod sa iyang kaalam gikan sa iyang gieskwelahan apan sa iyang pagkaandam sa pagpangalagad subay sa mga pagtulon-an nga iyang nakat-onan.

Nahibalo si Padre Jerick sa hiyas sa pagkamasulondon nga gikinahanglan niyang puy-an isip usa ka pari, mao nga dili siya muhandom ug uban pang mga tahas o assignments ug magpaabot lamang kung asa siya ibutang ug gikinahanglan sa Simbahan.

Balik sa iyang gisulti nga walay late vocation, naghatag siyag lamdag ngadto sa mga layko nga mga young professionals nga nag-aninaw sa pagsulod sa relihiyosong kinabuhi, nga sa ila kunong pagpamalandong mas nindot nga ubanan diha sa pag-ampo. Siya nanghinaot nga sa atong pagkinabuhi atong hinumdoman nga kita gi-andam sa atong misyon ug nga ang atong panahon lahi sa panahon sa atong Ginoong Dios.