Dyutay ra ba ang maluwas?

Ika-21 nga Domingo sa Ordinaryong Panahon (August 21, 2022)
Is 66:18-21 / Ps 117:1, 2 / Heb 12:5-7, 11-13 / Lk 13:22-30

Ginoo, pipila ra ba ang maluwas?” Kini gipangutana sa mga tawo sukad pa kaniadto ug gipangutana gihapon kini hangtod karon. Langit, impyerno, kaluwasan, panghimaraot – kinsa ang makasulod ug kinsa ang makagawas? Nagpabilin kita nga nahingangha niini nga pangutana sa dugay na nga panahon.

Unsaon nato pagtubag niini? Ang doktrina mahitungod sa impyerno maoy resulta sa duha pa ka sukaranan sa kamatuoran nga mao, nga ang Dios gugma ug nga kita gawasnon. Ang gugma mao ang tanang butang nga gikan sa Dios. Dili Siya mawad-an ug gugma kanato. Dili mausab ang Iyang hunahuna diri kanato. Walay gipili ang Iyang gugma. Sa pagkatinuod sama Siya sa adlaw nga nagdan-ag sa maayo ug sa daotan, matod pa sa mga pulong ni Hesus. Wala kitay mabuhat nga makapugong sa Iyang gugma diri kanato. Ug tungod niini, sama Siya sa usa ka maayo nga ginikanan.

Hinuon, gawasnon kita. Dili kita mga puppet sa Diyos. Gawasnon kita nga mu-ingon ug oo o mu-ingon ug dili sa Iyang gugma. Wala kita Niya gipugos nga higugmaon nato Siya. Kon kita muduol Kaniya, sama kita sa usa ka bulak nga kanunay namulak apan kung ato Siyang talikdan, sama kita sa usa ka dahon nga laya.

Pamatikdi kun giunsa pagtubag ni Hesus ang pangutana. Siya miingon kanila, “Paningkamot gayod kamo sa pagsulod sa masigpit nga pultahan.” Sa laktod nga pagkasulti, undanga ang panaglalis kon pila kabuok ang maluwas. Ang atong kaluwasan nagdepende kanato kung ato bang dawaton ang mga grasya ug ang gugma sa Ginoo. Sama sa gi-ingon ni San Pablo: “Paningkamoti ang inyong kaluwasan nga may pagtahod ug kahadlok sa Dios.” (Filipos 2:14)

(Bro. Ignatius Gonzales, CFA)