Higayon Sa Kalipay, Higayon Sa Pagdayeg, Higayon Sa Pagtoo

Tuod man milabay na ang pista sa Balaang Kasingkasing ni Hesus niadtong Hunyo 16 o unang Byernes matapos ang Corpus Christi, misaulog ang mga taga Most Sacred Heart of Jesus Parish sa Calinan sa ilang ika-74 nga kapistahan.

Sa pagbalik tanaw, gipili sa mga taga Calinan kining adlawa, unang Byernes sa Agosto tungod kini haom sa panahon sa ting-ani ug angay lamang silang magpasalamat sa mga grasyang nadawat. Wala na kini nila usba tungod kini na ang nasugdan sa mga katigulangan uban sa mga kaparian kaniadto.

Bisan tuod mibundak ang ulan ubay-ubay pa gihapon ang mga parokyano nga nanimba sulod sa una hangtod sa ika-upat nga misa sa buntag. Sa alas ocho gipahigayon ang Pontifical Mass nga gipangulohan sa atong arsobispo sa Dabaw Most Rev. Romulo G. Valles ug espesyal tungod inubanan sa taga Calinan nga obispo sa Mati nga si Most Rev. Abel C. Apigo, D.D.

Sa pamalandong ni Abp. Muloy, iyang gitagaan ug patigbabaw nga ubos sa treinta ka tuig nalang mag centennial na ang parokya. Ug ang dagan sa panahon paspas busa dali nalang kaayo. Nagmalipayon siyang naglantaw tungod daghan ang mga kabatan-onan ug sigurado siyang maabtan pa nila kini nga selebrasyon.

Aron madungagan ug mapalambo ang pagtoo, mipaambit si Abp. Muloy ug tulo ka puntos sa kamatuoran gikan sa binasa. Unang punto gikan sa sulat ni Propeta Ezekiel nga ang mahal nga kasingkasing ni Hesus ang maong dakong kasegurohan nga Siya, ang Dios mangita kanato. Ang atong hagit, ang angay pamalandungan kung unsa ug kinsa ang Dios. Siya maoy mangunay pagpangita kanato.

Ikaduha, gikan sa sulat ni San Pablo sa mga taga Roma, ang kasingkasing ni Hesus, nahigugma labi pa sa mga walai bili, niadtong mga tabangunon, mga makasasala sama kanato. Ikatulo, gikan sa Ebanghelyo ni San Lukas nga nagpakita sa kinaiya sa kasingkasing ni Hesus nga bisan dili nato masabtan tungod sa iyang paghigugma, dili matukib nga panghunahuna nga biyaan ang 99 alang sa usa nga nasaag.

Kining pistaha, nagpahinumdom kanato sa dakong paghigugma sa Ginoo ug nga kita mga huyang nga karnero ug nanginahanglan sa Iyang pag-amuma sa kanunay.