Sta. Ana ug San Joaquin: mga Sumbanan ni Hesus

Ang kapistahan ni Sta. Ana ug San Joaquin nga mga apohan ni Hesus nataon usab sa adlawng natawhan sa kura paroko sa Sta. Ana Shrine Parish nga si Reberendo Padre Junar dela Victoria. Dili lang kini mao ang mga hinungdan sa pagtimbaya sa parokya kundili ang pipila pud ka mga selebrasyon sama sa ika-23 nga anibersaryo sa dedikasyon sa parokya isip shrine ug ang ika-duhang tuig sa World Day of Grandparents and the Edlerly tungod kay ang sumbanan sa pagkamaayong apohan si Sta. Ana ug San Joaquin man.

Panahon sa Pontifical Mass dunay pipila ka mga pari sulod sa bikaryato sa Sta. Ana nga mitimbaya uban sa nangulo sa misa nga atong arsobispo sa Dabaw, Most Rev. Romulo G. Valles, D.D. Nagmalipayon ang arsobispo sa iyang pagkakita sa pagduyog usab sa pipila ka mga religious priests nga Franciscan.

Kasagaran kanato, mailhan tungod sa pagsubay sa atong mga ginikanan ug apohan, ug dili exempted si Hesus niini. Nailhan si San Joaquin ug Sta. Ana tungod sila ang mga apohan ni Hesus, ug si Hesus pud nailhan tungod sa iyang ginikanan ug apil sa iyang apohan. Labi pa nga ang anak nila nga si Birhen Maria nahimong inahan sa manunubos. Nailhan ug giila sila sa katawhan.

Nindot nga larawan ang paghunahuna nga sa kaniadto gibisita sa apohan ni Hesus ang bag-ong silang nga bata nga anak sa Dios Amahan.

Panahon sa pamalandong dakong kalipay ni Abp. Valles nga daghan ang mitambong bisan tuod adlawng Martes ang maong pista. Gipunting ni Abp. Valles ang dakong kalambigitan sa mga ginikanan ni Birhen Maria sa luwasnong plano sa Dios tungod sila ang mga sumbanan ni Maria ug nahimo usab nga sumbanan ni Hesus. Si San Joaquin ug Sta. Ana ang nagmatuto sa inahan sa Dios nga mamahimong maayong anak, babaye ug inahan.

Dili ikalimod nga kon kita mga tawo makakita gani ug dili maayong kinaiya sa usa ka tawo ato dayon kining itandi sa iyang ginikanan ug apohan. Kung atong hunahunaon wala tingali ikasulti ang mga tawo kaniadto tungod sa maayong ehemplo nga nakita kang San Joaquin ug kang Sta. Ana.