Kahigayunan sa Maayong Piniyalan

Gilunsad ang ika-tulong hugna sa Fund Raising alang sa on-going Development project nga “TICTOC 65 4 CHRISTMAS” niadtong Agosto 7, Dominggo, sa St. Joseph Parish, Sasa. Hugot ug angay mapuy-an ang kinaiya sa usa ka piniyalan nga TRUSTFUL IN CHRIST, TRUTHFUL OFFERING TO CHRIST.

Gipahitabo ang kampanya sa pagpahibalo sa mga parokyano sulod sa tibuok adlaw ug hangtod sa gabii niadtong Dominggo. Ang turn over ceremony diin gidawat sa mga Pangulo sa Katilingban, Treasurer ug Tigpasayon sa Pundok banay ang mga gift boxes para sa Pledge Cards nahitabo sa matag Santos nga Misa.

Adunay unom ka pamaagi sa pagpanghatag. Ang tanan gidasig sa pagsalmot pinaagi sa pledges nga imong ikatampo, sa tinguha nga makab-ot ang 5 ka milyon sulod sa upat ka bulan alang sa ika-3 nga bahin sa ginatukod nga building.

Matag human sa misa gipahigayon ang TICTOC showdown, ang makalingaw nga Hand Paint Commitment, Dart Corner, Photo booth ug aron sa pagtubag sa imong kauhaw ug kagutum mopalit lang ka sa Food stalls.

Good vibes ug puno sa energy ang programa sa gabii, ug visible kaayo ang mga kabatan-onan labihan sa pagpangandam sa ilang presentasyon, wala pod magpalupig silang mga KUYA, aduna pod Hagibis sa Parokya ug ang D’Singing Devotional group. Kini ang mga nakadaog sa TICTOC Showdown Contest: Champion – Zone 1 , 2nd place – Zone 5 ug ang 3rd place – Zone 8.

Nagmalampuson gayod kining TICTOC 65 Committee nga gipanguluhan ni Marisol Tiu uban sa iyang mga makugihong myembro nga naningkamot nga mahiusa ug dunay malipayong kasingkasing.

Tungod nila ni Fr. Leonardo “Bong” Dublan, Jr. ug Fr. Evan Esmade, nga maoy insperasyon nga nadasig usab ang mga GSLs nga midawat sa hagit sa pagkamanggihatagon ug makugihon nga moawhag sab sa uban.

Matud pa ni Fr. Bong, ang kura paroko ug nagpaluyo niining kampanya sa proyekto sa Parokya, lain na usab nga oportunidad nga mopaambit sa mga gasa nga nadawat gikan sa Ginoo, balik halad sa Ginoo.

Sa dakong paglaom, uban sa giya sa Espirito Santo ug panabang ni San Jose ang tanan posible alang sa kahimayaan sa Dios. (Amie Desquitado | SJWP SoCCom)