Magmaluluy-on Unta Kita Sama Kaniya

Ika-22 nga Domingo sa Ordinaryong Panahon (August 28, 2022)
Sir 3:17-18, 20, 28-29 / Ps 68:4-5, 6-7, 10-11 / Heb 12:18-19, 22-24 / Lk 14:1, 7-14

Niining Dominggoha ang atong mga pagbasa ilabina diha sa atong Ebanghelyo naghisgot mahitungod sa pag-ayo ni Hesus sa masakiton sa adlawng igpapahulay. Si San Lukas misaysay kanato diha sa Ebanghelyo nga mas gipalabi ni Hesus kadtong nanginahanglan sa iyang kalooy ug panabang kaysa sa balaod nga gipatuman sa mga Pareseo.

Sa akong pagpamalandong bahin niining atong mga pagbasa karon, tugoti ako sa pagpaambit kaninyo sa duha lamang ka mga punto. Una, mao ang kabililhon sa kinabuhi sa tawo. Ikaduha, mao ang pagkamasinugtanon sa kabubot-on sa Ginoo.

Diha sa unang pagbasa sa basahon ni Sirac gihisgutan ang gasa sa pagpaubos. Ang atong kinabuhi isip usa ka sumosunod ug magsasangyaw sa pulong ni Kristo usa ka gasa nga gipaambit sa Ginoo nganhi kanato ug gikinahanglan nato nga maningkamot nga mamahimo kitang mapaubsanon diha atubangan sa Dios ug sa iyang katawhan. Maningkamot usab kita nga mamahimong buhing saksi sa gugma sa Dios ug ipakita ang Iyang buhing gugma ngadto sa uban nga wala na mibati ninii.

Diha sa ikaduhang pagbasa sa sulat ngadto sa mga Hebreo kini naghisgot mahitungod sa pagpanambag sa katawhan, nga kinahanglanon gayud ang pagdisiplina sa kaugalingon aron mamahimong magmatinumanon ug magmasinugtanon sa kabubot-on sa Dios. Ang pagdisiplina ug pagsunod sa kabubot-on sa Dios usa ka timaan sa atong dakong gugma Kaniya. Ang atong gugma diha Kaniya nagasukad usab sa gugma nga Iyang gitagana nganhi kanato. Ang gugma nga mao’y basehanan sa pagpangalagad isip mga sumosunod ni Krsito.

Sa katapusan, diha sa atong Ebanghelyo si Hesus nagpakita ug kahingawa sa nag-antos nga tawo ug nagtudlo kanato kon sa unsang paagiha nga kita magmaluluy-on ngadto sa uban. Hinaot nga kita mopili sama sa gibuhat ni Hesus sa pagtabang ug pagbayaw uban sa kalooy ug pagpasaylo. Mamahimo kitang makaambit sa kaluwasan nga gitagana kanato sa Ginoo kung maningkamot ug magmasinugtanon kitang motahan sa atong kinabuhi ngadto sa uban ug labaw sa tanan sa atong Ginoo. Ang pagpaambit ngadto sa uban ilabina kadtong mga nanginahanglan sa atong kalooy ug panabang maoy dakong kabahin sa atong misyon isip mga sumosunod ni Kristo. Kitang tanan gitawag sa pagpangalagad ngadto sa mga nanginahanglan ug labing ubos kanato aron kita makasulod diha sa gingharian sa Dios ug aron usab mamahimo kitang labing angayan diha sa misyon nga gihatag ni Kristo nganhi kanato. (Bro. Julius Lugay)