FLA WORKERS: “Sugdi ang Bag-ong Sibilisasyon sa Pamilya ug Kinabuhi”

Sobra 400 ka mga lumilihok sa Family and Life Apostolate gikan sa 40 ka mga parokya sa Arkidayosis sa Dabaw ang giaghat nga sugdan ang bag-ong sibilisasyon sa Pamilya ug Kinabuhi.

Nagtapok ang mga FLA workers Hulyo 30, 2022, Sabado sa San Pablo Parish Pavilion alang sa selebrasyon sa ika-10 nga World Meeting of Families sa pagpamalandong sa tema nga “Ang Gugma sa Pamilya: Usa ka Bokasyon ug Dalan ngadto sa Kasantos” (Family Love: A Vocation and A Path To Holiness.)

Atol sa santos nga misa, gipasalamatan ni Reberendo Padre Orlando Angelia, Spiritual Director sa FLA sa Arkidayosis sa Dabaw, ang mga frontliners sa pag-promotar sa kabalaan sa kaminyoon ug sa pamilya.

Iyang gipaambit ang mga pulong ni Papa Francisco atol sa kasaulogan sa 10th World Meeting of Families sa Roma niadtong Hulyo 25, 2022 nga ang matuod nga gugma mamahimong ulipon sa lain, apan sa positibo nga pamaagi sa mga minyo diha sa pagpanday ug pamilya inubanan sa grasya sa Dios naghimo ug maisugong desisyon sa kaugalingon, sa paghigugma sa isigkaingon kinsa buot nga makasalo sa kinabuhi panahon sa kalisod o kaabunda, sa kasakit o sa maayong panglawas.

Apan, gipadayag ni Fr. Orly ang kasubo sa mga lakang sa pipila ka mga magbabalaod sa nasud sa pagsang-at ug laing balaodnon nga buot himoong legal ang diborsyo, “Sila nga mga lideres nga atong gipili, sila ang nag-una-una; ngano gusto sila nga dunay diborsyo?”

Sa panahon ni Hesus, siya midugang, ang mga lideres nga si Herod ug Herodias anaa sa kahimtang sa pagpanapaw sanglit si Herodias, nga gipuyo ni Herod, asawa man sa iyang igsoon nga si Pilipo. “Gi-corrupt nila ang very fabric of marriage,” midugang si Fr. Orly.

Gisaysay niya ang nahitabo sa Ebanghelyo nga gihilo-an ni Herodias ang panghunahuna sa iyang anak nga babaye nga si Salome human nga nalipay pag-ayo si Herod sa iyang pagsayaw ug gipabungat sa bisan unsang iyang pangayoon: ug gipangayo niya ang ulo ni San Juan Bautista.

Susama ning panahon karon, si Fr. Orly nagkanayon, “we are confronted with the new herods, corrupting the hearts and minds of the young; indoctrinating their minds that it is okay to get divorced, that it is okay to have same sex marriage. We must not allow them to destroy the sanctity of marriage as instituted by the Creator.”

Alang kaniya, ang pagpatay kang San Juan Bautista nagapanghitabo gihapon karon tungod kay minilyon ka mga inahan ang mipili nga magpakuha sa gisabak. Hinoon mapasalamaton si Fr. Orly nga gibali sa Korte Suprema sa Estados Unidos ang desisyon kalabot sa aborsyon, apan nagpabilin nga wala kini tumana sa ubang mga Estado.

“Let us not allow the family to be poisoned by the toxins of selfishness,” sumpay ni Father ug nga mao kini ang hinungdan nganong gipapatay ni Herod si San Juan Bautista—tungod ug alang sa kaugalingon nga kalipay.

Gibutyag ni Fr. Orly nga sa gipa-ilawom niya sa counseling, ang hinungdan sa pagluib sa 90-95% sa mga bana sa batan-on ug mga middle aged nga mga magtiayon, dunay usa ka kumon nga butang, anaa ang pagka-hakog (selfishness).

Iyang gihimong panig-ingnan si San Jose, ang tiunay nga bana ni Maria, ang haligi sa Sagrada Pamilya, kinsa nagbaton nga ang paghigugma sa pamilya kanunay nga naglantaw sa kaayuhan sa ubang sakop ug dili kini naglantaw sa kaugalingon lamang.

Si San Jose ang modelo sa pagka-lalaki, dili ang matang sa mga giingon sa mga kaubanan nga MACHO kung daghan ug babaye ug mga bisyo, nga usa ka matang sa pagka-hakog, “That is the attitude of Herod.”

Ang matuod nga pagka-macho sa usa ka lalaki, siya nagkanayon, mao kadtong dunay pagpugong sa kaugalingon alang sa kaayohan sa pamilya, sama kang San Jose kinsa andam nga manalipod sa kabalaan sa kaminyoon ug kinabuhi sa pamilya.

Busa, gihangyo ni Fr. Orly ang mga FLA workers sa pagmugna ug bag-ong sibilisasyon sa pamilya ug kinabuhi sa Arkidayosis. Iyang gibutyag nga dunay bag-ong dokumento si Papa Francisco nga naglatid sa pag-ubay niadtong buot nga magpakasal sa simbahan nga kinahanglan nga buhaton karon. Sama sa catechumenal nga pamaagi, nga sa hinay-hinay nagsilsil sa ilang mga alimpatakan, ang pagahigmata sa presensiya sa Diyos, nga nagsukad sa ilang mga kasingkasing nga nagpalig-on sa pagtoo.

“Interpreting the word of God so that they will be ready to say YES to one another and YES to God because saying YES to your partner is saying YES to God, the author of married life,” si Fr. Orly midugang.

Tambag usab niya ngadto sa mga asawa nga mamalandong nga ang Simbahan mao ang pangasaw-onon ni Kristo; ug ang Dios nagtanyag sa kinatibuk-an niyang kaugalingon alang sa gugma sa iyang Simbahan.

“There should be a total giving and receiving in marriage and family life so that all of you will always go and follow the right path towards holiness because family life is a vocation from the Lord; it’s not yours, you just responded to it, and that call is towards the path of holiness,” namahayag si Fr. Orly.

Iyang gipasabot nga sa bag-ong sibilisasyon, taliwala sa mga kalisdanan, krisis ug pagsulay, anaa ang panag-uban sa panaw (synodality), ang mapadayonon nga pag-alagad taliwala sa pagsulay nga normal lamang sa mga Kristohanong Banay inubanan sa Balaang Espirito.

Sama sa gikaingon ni Santo Papa Juan Pablo dos, ang ministriya sa pamilya mao ang ministrya sa tanang mga ministriya.