Gabalik-Balik Lang

Dear Ate Emz,

Ako ang breadwinner sa among pamilya ug sa gamay nakong kita sa pag-panarbaho, sa ako sila naga-asa.

Ang akong ipaambit mao kini bang bili sa atong ginabuhat adlaw-adlaw. Inig mata sa buntag sama gihapon sa kagahapon. Trabaho sa matag adlaw aron nga naay kitaon maka sustener sa pang adlaw-adlaw nga panginahanglanon sa pamilya. Mga gagmay kausaban sa matag adlaw in terms of daily routine. Paningkamot ug kugi aron maayo ang performance sa atong task sa matag adlaw sulod sa trabahoan. Kining maong cycle usahay maka wala og gana. Bation ko ang kakapoy. Ubanan pa sa mga problema sa pinansiyal.

Kung mubo lamang ang akong pasensiya siguro nag breakdown na ako. Taas lang ang akong determinasyon nga padayon lang gyod sa kinabuhi kay lagi aduna akoy sakop nga sa akoa naga depende. Dili pwede nga akong ipakita ang akong weak side kay basin ma husno ang ilang paglaom. Dako sab ug kabahin kung hugot ang atong pagtoo sa atong GINOO.

Unta sa karong mga panahon kada bag-ong adlaw nga atong atubangon, dunay kabag-ohan bisan gamay lang. Igong kusog ug giya sa atong Ginoong Dios ang kanunay kong pag-ampo nga maga uban kanato sa matag karon ug unya. Pasalamat gihapon ako sa Dios Amahan taliwala sa mga kasaypanan ug mga suliran Siya makanunayong puno sa gugma, kamatuoran ug kaluoy.

Daghang Salamat,
Arneli

* * * * * *

Dear Arneli,

Ang pagbaton ug trabaho, bisan unsa ka gamay ang kita, maoy usa sa mga bililhong panalangin nga gihatag sa Dios kanimo, busa, angay lang gyud nga mapasalamaton ka niini. Daku na kini nga tabang aron makasustener sa panginahanglanon sa imong pamilya. Kung ikaw ang breadwinner, kanunay kinahanglan ang igong kusog ug maayong panglawas aron makasagubang ka sa mga hagit sa panarbaho ug usa sa mga hagit niini mao ang pagbati nga balik-balik na lang ang imong ginabuhat sa adlaw-adlaw. Hinuon, tinuod kini, ilabina kon ang matang sa trabaho kay mekanikal ra kaayo nga morag walay kahulogan o hinungdan. Sama sa pagmata sa buntag moingon dayon, “trabaho na sab!” …mao nga usahay moguyod ka sa imong kaugalingon ngadto sa trabaho nga bug-at ang disposisyon, ilabi na kung naa pa gyud bitbit nga problema. Dugang pa niini, usahay ang kinabuhi mahimong bug-at ug kapoy ilabi na kung pasagdan lang nimo moagi ang matag adlaw nga walay katuyoan.

Apan, kung sa laing bahin, sa imong pagmata matag buntag, diha-diha dayon nagpasalamat ka sa Ginoo alang sa gasa sa kinabuhi ug gasa sa usa ka bag-ong adlaw, ug ihalad ngadto Kaniya ang tanan nimong mga paningkamot nga makaserbisyo pinaagi sa imong panarbaho, lagmit ang imong adlaw mahimong mas makahuloganon uban nianang malipayong disposisyon.

Hinumdomi ang gisulti ni St. Mother Teresa of Calcutta nga “mahimo nimong mabag-o ang usa ka ordinaryo nga adlaw sa usa ka butang nga makahuloganon kung buhaton nimo ang ordinaryong mga butang nga adunay talagsaon o dakong gugma.” Niining paagiha dili makalaay ang imong adlaw ilabi na kung sa pagsugod nimo, ipataas ngadto Kaniya ang imong mga espesyal nga intensyon diha sa imong mga paningkamot, mga sakripisyo, ingon man ang kalipay nga dala sa imong trabaho.

Salamat sa Ginoo nga naa kay pasensiya ug detrminasyon sa pagpadayon sa pagpaningkamot bisan pa sa mga kalisdanan nga imong nasinati alang sa kaayohan sa imong pamilya nga nagdepende kanimo. Gihisgotan nimo nga bisan pa sa mga kalisdanan, dili nimo gusto nga mahibal-an nila ang imong kahuyang kay basin ang ilang mga paglaom mahugno. Kabalo ka, dapat ipakita nimo ang tinuod nga ikaw, nga dili ka superman, nga usahay makabati ka ug burn-out sa imong mga paningkamot nga masustener ang panginahanglan sa imong pamilya. Importante nga dawaton sab nimo nga huyang ka ug okay ra ang maluya usahay, busa, dili kini angayng ilimod.

Be yourself. Sa panahon sa imong kahuyang, gihatagan ang imong pamilya ug oportunidad sa pagsuporta kanimo ug paghatag kanimo ug igong kusog sa pagpadayon sa imong mga paningkamot alang kanila. Let them know that you also have your needs, otherwise, you get depleted and will have nothing more to give.

Naghinaot ka nga “unta sa karong mga panahon kada bag-ong adlaw nga atong atubangon, dunay kabag-ohan bisan gamay lang.” Unsa kaha ang mga kabag-ohan nga unta inyong mabuhat? Unsa kaha kung buhaton nimong mas mahunahunaon ka sa mga katuyoan sa imong mga gibuhat aron dili lang kini mahimong “routine and mechanical” apan naay kahulogan?

If you have not done this yet, how about initiating praying together as a family, like praying the rosary before the day ends? Remember, the family that prays together stays together and in this way you draw strength from each other, and above all, you draw strength from God who becomes the center of your family life. Furthermore, each day becomes more meaningful not only for you but for the whole family as well.

Paningkamuti ang pagpalambo sa kinaiya sa pagkamapasalamaton. Hinumdomi nga ang tanan, grasya gikan sa Ginoo, ug ang mga tawo nga mapasalamaton, mahimong malipayon. Busa, kanunay kang makapaabot sa matag adlaw nga mahimong makahuluganon ug bililhon, nga naa gyud kanunay rason sa pagpasalamat ug pagdayeg sa kaayo sa Ginoo.

Dinha sa imong trabahoan, pagsugod ug pagpaningkamot nga mahimo kang usa ka ”transforming presence” pinaagi sa imong kaandam sa pagtabang sa uban. Mas magpakabana ka sa ilang mga panginahanglan, uban ang malipayong disposisyon sa imong trabaho, ug lain pang maayong mga buhat nga imong mapaambit alang sa kaayohan sa kumpanya ug sa imong mga kauban. Sa laing pagkasulti, mahimo kang panalangin sa uban sama nga nakadawat ka ug daghang panalangin gikan sa Ginoo.

God bless you more.
Ate Emz