Padilaaba ang Kalinaw nga dala ni Kristo

Ika-20 nga Domingo sa Ordinaryong Tuig (August 14, 2022)
Jer 38:4-6, 8-10 / Ps 40:2, 3, 4, 18 / Heb 12:1-4 / Lk 12:49-53

Ang kalinaw nga dala ni Hesus lahi kay sa kalinaw nga nailhan ug ikahatag sa kalibutan. Kini gayod ang hinungdan nga ang atong Ginoo nag-ingon diha sa ebanghelyo nga mianhi Siya aron sa pagpadilaab og kalayo sa kalibutan ug diin Siya usab nanghinaot nga mosilaob kini. Kining maong hulagway nagpunting sa mga pagtulon-an ug buhat sa atong Ginoo nga sukwahi kaayo sa pagkinabuhi sa kalibutan.

Ang una nga punto sa atong pamalandong mao nga ang Dios gugma ug nahigugma Siya kanato sa hilabihan. Gusto sa Dios nga makighimamat ug makig-uban kanato nga Iyang mga binuhat. Tungod sa naghingapin nga gugma sa Dios kanato andam Siya pagpadayag niini ngadto sa tanan. Apan, ang kalibutan nga Iyang binuhat ug gihigugma pag-ayo, sukwahi kaayo ang mga binuhatan ug tumong, ug tungod niini gusto sa Dios nga mahibalik ang kalibutan ngadto sa Iyang plano ug padulngan. Gusto sa Dios nga ang Iyang gugma maoy maghari sa tanan ug dili ang kahakog, kalaw-ay, gugma sa mga kalibutanong bahandi ug bisan gani ang paghigugma sa pamilya labaw pa kay Kaniya. Dugang pa niana, ang ebanghelyo nag-ingon “Siya nga nahigugma sa amahan o inahan labaw pa kay Kanako, dili takos Kanako.” Wala gayod kita did-i sa paghigugma sa atong ginikanan, apan gidid-an kita sa mas labaw nga paghigugma kanila kaysa sa Dios. Ang mga anak tinuod nga mga panalangin gikan sa Ginoo, ug walay usa nga kinahanglan mahigugma sa panalangin nga Iyang nadawat labaw pa kay sa Dios kansang panalangin nadawat kinahanglang tipigan.

Ikaduha nga punto, mao nga gusto sa Dios nga hugasan kita sa atong mga sala pinaagi sa bunyag sa tubig ug espirito. Ang pagmatuod sa kalayo nga gipadala ni Kristo alang sa kaluwasan ug kaayohan sa tanang katawhan. Ang Dios nga nagtugot nga ang tanan natong kasingkasing mapuno niini. Ang kalayo mao ang makaluwas nga mensahe sa ebanghelyo ug sa gahom sa mga sugo niini. Nabugnaw kita ug nahimong patay tungod sa sala ug sa pagkawalay alamag nato sa mga kinaiya sa Dios. Apan, ang ebanghelyo nagdilaab kanatong tanan dinhi sa yuta sa usa ka kinabuhing diosnon ug naghimo kanato nga mainiton sa espirito, sumala sa pagpadayag ni San Pablo. Pinaagi sa bunyag kita nakadawat sa kalayo ug sa Espirito Santo. Atong hinumdoman ang giingon sa Ginoo kanato: “Sa pagkatinuod, sultihan ko kamo, gawas kon kamo matawo gikan sa tubig ug espirito dili kamo makasulod sa gingharian sa Dios.” (Jn 3:5)

Sa katapusan, ang gugma sa Dios nga gipadayag pinaagi diha sa pag-ula Niya sa krus naghimo kanato nga gawasnon sa sala, ug mga lumulopyo sa gingharian sa langit. Kita nga mga binunyagan makahimo na nga mosalmot sa bangkete nga giandam sa Dios didto sa langit. Apan kinahanglan nga atong padilaabon kanunay ang kalayo nga anaa sulod kanato aron nga si bisan kinsa nga makakita niini makasinati sa presensya sa Dios ug ang kalinaw nga dala ni Kristo, maato ug mao usab kini ang atong ikapaambit ngadto sa tanan. Ang kalinaw nga nagsukad diha sa atong kinahiladman nga naggikan kang Kristo Hesus maghatod kanato sa kinabuhing walay katapusan. (Bro. Soren Abellanosa)