Herarkiya Alang Sa Kahiusa

P: Nganong gitukod man ni Cristo ang herarkiya sa Simbahan?

T: Gitukod ni Cristo ang herarkiya sa Simbahan  uban sa misyon sa pagpakaon sa katawhan sa Dios sa iyang ngalan ug alang niini nga katuyoan, gitugyanan niya kini og gahom. Gilangkoban ang herarkiya og mga sagradong alagad, mga Obispo, mga pari ug mga diyakono. Gumikan sa sakramento sa mga Orden, ang mga Obispo ug mga pari nagabuhat sa  ilang ministeryo sa ngalan ug persona ni Cristo, ang Ulo. Naga-alagad  sa katawhan sa Dios ang mga diyakono sa diakonia (pagpangalagad) sa pulong, liturhiya ug buhat sa gugma.

P: Sa unsang paagiha nangalagad ang simbahan isip nagkahiusang pundok?

T: Nunot sa panig-ingnan sa napulog duha ka mga Apostoles nga hiniusa nga gipili ug gipadala ni Cristo, ang panaghiusa sa herarkiya sa Simbahan usa ka pagpangalagad sa kahiusahan sa tanang matuohon. Ang matag Obispo nagahimo sa iyang  pangalagad isip sakop sa Hugpong sa mga Obispo nga hiniusa uban sa Santo Papa ug naga-ambit uban kaniya diha sa pag-atiman sa malukpanong Simbahan. Ang mga pari nagabansay sa ilang pangalagad dinha sa Pundok sa mga Presbetero sa Simbahan nga lokal nga hiniusa uban sa ilang kaugalingong Obispo ug ubos sa iyang pagdumala.

P: Nganong maingon man nato nga ang simbahanong ministeryo adunay personal nga kinaiya usab?

T: Ang ministeryo sa Simbahan adunay personal nga kinaiya usab sa hinungdan nga ang matag ministro, gumikan sa sakramento sa mga Balaang Orden, adunay tulubagon atubangan kang Cristo nga mitawag kaniya sa personal nga paagi ug misangon kaniya sa iyang misyon.

(Cf. Kompendiyo sa Katekismo sa Simbahang Katoliko, 179-181)