Ambulansya alang sa mga Seminarista

Dakong kalipay ang nabati sa mga formators sa St. Francis Xavier College Seminary niadtong Hunyo 22, adlawng Miyerkules tungod sa usa ka surpresa pinaagi sa amublansya nga gihatag ni Mr. Marcelino Escalada Jr.

Sa pagkatinuod kini gidonar alang sa Arkidayosis sa Davao, ug dakong kalipay nga sugyot ni Arsobispo Romulo G. Valles, D.D. nga sa XACOSE kini gamiton. Pipila ka higayon na sab nga dunay mga sitwasyon sulod sa seminaryo nga nagkinahanglan ug hinanaling transportasyon ngadto sa mga dagkong ospital sa dakbayan.

Dili kalikayan nga ang mga seminarista, tungod sa ka-awaaw sa palibot, dunay mga ihalas nga mananap nga makapaak kanila o panagsa makabaton sila ug ginagmay nga mga injury tungod sa ilang pisikal nga mga akitibidad sulod sa pormasyon.

Ang ambulansya dako gayong tabang sa pagtransporta sa mga maangol ug mangasakit padulong sa ospital nga puno sa seguredad. Gipaabot ni Fr. Orlando Angelia ang iyang dakong pasalamat sa naghatag niini.