Ipaambit si Kristo ngadto sa tanan

Ika-18 nga Domingo sa Ordinaryong Tuig (July 31, 2022)
Ecc 1:2; 2:21-23 / Ps 90: 3-4, 5-6, 12-13, 14, 17 / Col 3: 1-5, 9-11 / Lk 12: 13-21

Adunay mga butang sa kalibutan nga angayan ipaambit ngadto sa uban ilabina niadtong gihikawan niini. Ang atong ebanghelyo karong Dominggoha nagpadayag nga dili kita malingla sa mga kalibutanong mga bahandi, apan atong paningkamotan nga magtigom kita ug mga bahindi nga langitnon. Ang sambingay sa usa ka dato nga hungog nagpadayag nga siya wala gayod magtagad sa pagtigom ug mga bahindi nga langitnon apan iyang gipasulabi ang iyang kahakog sa mga kalibutanong bahandi, siya miingon man sa iyang kaugalingon nga “gub-on ko ang akong mga kamalig ug magtukod ako og labaw pa kadako niini ug tapukon nako didto ang tanan nakong mga lugas ug katigayonan.” Kini nga kinaiya nagpakita lamang nga ang iyang gusto nga kab-oton mao lamang ang pagpalambo sa iyang kaugalingon ug dili makamaong mutabang sa uban. Sa subra niyang kahakog sa iyang mga katigayonan, siya nabutahan, ug dili na makamaong molantaw sa panginahanglan sa uban.

Diha sa atong pagka – Kristiyanos: sumusunod sa atong Ginoong Hesukristo, kita gipahinumdoman nga dili unta kita maulipon sa mga kalibutanong mga bahandi apan atong ipunting ang atong mga pangandoy ug tinguha ngadto sa mga langitnong mga butang kay matod pa ni San Ambrose “Ang mag-uban lamang kanato sa kamatayon mao lamang ang birtud ug ang kalooy.” Matuod gayod kini, tungod kay kon moabot na kanato ang higayon nga kita mobalik na ngadto sa sabakan sa atong Langitnong Amahan ang mga mga bahandi nga atong gitigom mapanunod lamang sa ubang tawo ug ang bugtong mahinumdoman mao lamang ang atong paghigugma sa uban nga makita diha sa atong pagpaambit sa kon unsa ang anaa kanato.

Sa katapusan, ang atong Ginoong Hesukristo nagpaambit sa Iyang kaugalingon sa walay pagduha-duha. Gihukas niya ang iyang pagka-Diyos ug iyang gisul-ob ang pagkatawhanon. Mao kini ang matuod nga paghigugma ug dili sama sa gugma nga gipakita sa usa ka dato nga hungog nga walay laing gihunahuna kon dili ang iyang kaugalingon. Ang pag-ula sa Iyang dugo ngadto sa krus usa ka pagpadayag sa dakong gugma sa Dios kanatong tanan. Kining atong nadawat nga bahandi nga gikan sa Dios nga mao ang buhing pagtuo, ato kining ipaambit ngadto sa uban. Si Kristo mao ang “euaggelion” (yoo-ang-ghel’-ee-on) o maayong balita nga atong ipaambit sa tanan aron kita makabaton sa mga bahanding langitnon nga diin walay mga taya ni pagkadunot sama sa mga kalibutanong mga bahandi nga madunot ug mahanaw. Atong ipaambit si Kristo sama nga Siya mipaambit sa iyang kaugalingon nganhi kanato. (Bro. Soren Abellanosa)