Isangyaw ang imong gituohan, buhata ang imong gisangyaw!

Ika-16 nga Domingo sa Ordinaryong Tuig (July 17, 2022)
Gen 18:1-10 / Ps 15:2-3A, 3BC-4AB, 5 / Col 1:24-28 / Lk 10:38-42

Nakadungog naman siguro kitang tanan sa gisulti sa Obispo ngadto sa mga ordinahang mga pari:” Isangyaw ang imong gituohan, buhata ang imong gisangyaw”. Tukma kaayo kini nga pamalandong sa atong madungog nga ebanghelyo. Ang matuod nga kahulugan sa pag-alagad mao ang pag-alagad nga puno sa gugma sa imong gialagaran ug dili sama sa pag-alagad ni Martha. Si Martha, nakatutok sa mga buhat sa pagpangandam alang kang Hesus. Pagpangandam nga materyal sama sa pagkaon alang kang Hesus. Ang iyang pag-alagad, nahipunting sa mga panggawas nga panginahanglan ni Hesus. Tinuod dili usab kana dautan apan, wala niya makit-i ang labing mahinungdanon kaayo sa kinabuhi sa usa ka tawo. Ang iyang kasingkasing ug salabutan halayo kang Hesus tungod sa iyang mga kabalaka sa pagpangandam. “Ginoo dili ka ba manumbaling nga gipsagdan man lamang ako sa akong gsoon sa tanang buluhaton sa balay? Dili ba ang iyang mga pulong aduna nay pagbagolbol, reklamo ug pasangil.

Sa laing bahin, si Maria nag-abi-abi kang Hesus pinaagi sa pagpaminaw, pagtuon, pagpaduol, hangtod maadunay haduol nga relasyon sa usag usa. Iyang gipili ang pagpahiduol sa presenya sa Dios. Nga mao ang mahinungdanon sa tanang bulohaton nga gipaabot ni Hesus sa matag usa kanato.

Niining tungora atong matun-an nga kinahanglan diay nga adunay panaglambigit sa kasingkasing ug sa buhat. Adunay panagsagol sa pag-ampo ug sa buhat. Ang pulong sa atong mga ngabil kinahanglan mosaksi diha sa mga maayong binuhatan. Ang atong pagpaminaw o mga pag-ampo makita diha sa pamaagi sa atong pagkinabuhi. Sama kini sa “isangyaw ang imong pagtuo ug buhata ang imong gisangyaw”. Busa kita mag-ampo ug mobuhat, musimba sa Dios ug mobuhat sa iyang kabubut-on. Magdayeg kita sa Dios ug kini mobunga sa pagbuhat ug mga maayong butang ngadto Kaniya ug sa atong isigkatawo. Busa alang kanato kon buot kitang moalagad sa Dios, dili tungod kay aron dayegon, ilhon, ug gantihan, Moalagad kita tungod sa gugma. Moalagad kita nga puno sa pagpaubos, pagpaminaw. Moalagad kita aron makatabang sa atong isigkatwo. Amen.