Kalibutanong Haylo

Dear Ate Emz,

Single ako ug wala pay mga dagkong responsibilidad sa kinabuhi. Ang akong ipaambit simple ra nga kasinatian ug dili kaayo kumplikado. Mahitungod kini sa atong mga kaugalian. Kini bang dili ka gustong malamangan. Mao gyud kini ang akong batasan. Ambot ug dili gyud nako mawala-wala sa akong system. Dili ko gusto nga kung unsa bitaw anaa sa uban gusto ko nga duna sab ko. Mga gadgets, nindot nga sinina, sabay sa uso ug uban pa. Hinoon maka afford man ko kay kalooy sa Dios duna man koy permanenteng trabaho kaya lang ang akong kita mahurot diha sa mga maka-ingon kita ug vanity. Mura ba ug ma ibog ko sa uban magtan-aw nga nindut ug mga gamit unya akoa dili.

Unsaon ko kini pag-pugong nga mura man ug mangatol ko ug dili ko makahimo sa pagka hook niining vanity.

Mapasalamaton,
Banban

* * * * * *

Dear Banban,

Daygon ug pasalamatan ang Ginoo sa panalangin sa maayong trabaho nga nagsustiner sa imong inadlaw-adlaw nga pagkinabuhi! Salamat sa kaisog ug pagpaubos sa pag-ila sa imong mga kahuyang. Kining pagdawat sa imong mga kahuyang mao ang unang mga lakang padulong sa pagbag-o alang sa mas maayo ug sa katapusan mabuntog ang imong kalagmitan sa pagpadala sa tentasyon sa pagsunod sa imong gitawag nga “vanity.”

“Keeping up with the Joneses” will really make you a more envious and jealous person. Tungod niini kanunay kang naningkamot aron mamahimong mas maayo kaysa sa uban ug makigkompetensya kanila tungod kay giisip nimo sila nga imong kaatbang sa pagbaton og mas maayong mga butang sa kinabuhi. Busa, magpabilin ka nga dili malipayon. Mahimo nimong itagana ang tibuok nimong kinabuhi ug ang tanan nimong kwarta sa pagpaningkamot aron maangkon ang labing nindot nga mga butang, ang labing uso nga mga sinina, ang pinaka bag-o nga mga gadgets, ug uban pa. Apan hinumdomi nga kining tanan mga materyal nga mga butang ug lumalabay lamang, busa, mahanaw ra. “It is fine to want to look good but to want to look good ahead of being a good person, is selfish”.

Sa kasamtangan, tuguti ako nga imbitahon ka nga mogahin og panahon aron mag soul-searching. Sulayi pagsusi ang imong kaugalingon kung asa gikan ang imong mga pangandoy sama sa gusto nimo ang labi ka maayong mga butang sa kinabuhi, ug ang kalagmitan nga dili ka papildi o malamangan sa daghang mga butang o mga panghitabo. Unsa kaha ang mga gihikaw kanimo kadtong batan-on ka pa? Imong maobserbahan nga adunay pipila ka mga indibidwal kansang mga kawad-on sa bata pa sila, kusog kaayo nakaimpluwensya sa ilang kinabuhi. Ug sa ilang kabahin, ilabi na kung naa na silay katakus sa panalapi, wala sila mahibalo nga kining sobrang pagpaningkamot nagikan diay sa pangandoy nga maangkon gyud kung unsa ang ilang gihikawan kaniadto. Dugang pa niini, naa usab uban nga adunay pangandoy alang sa usa ka butang nga ilang gihunahuna nga makapabati kanila sa hingpit nga katagbawan, apan sila nagpadayon sa pagkapakyas sa pag-angkon niini. Kanunay naay pagbati nga kahaw-ang nga dili gyud mapuno bisan pa kung giunsa nila pagsulay sa pagtagbaw sa ilang kaugalingon.

Kon imong hunahunaon, ang tawo nangita nianang makakompleto sa iyang kaugalingon. Apan ang uban wala gani mahibalo kon unsay ilang gipangita. Sa laing bahin, naa sab uban nga nagpuyo nga malinawon, malipayon ug kuntento sa ilang kinabuhi. Tingali wala ka makaamgo niini apan kining walay katapusan nga kagutom o kauhaw mao gayud ang atong kinasulorang pangandoy sa atong Ginoo! Walay bisan unsa ug walay bisan kinsa ang tinuod nga igo gyud nga makatagbaw nianang kagutom o kauhaw. GOD ALONE SUFFICES…sa ato pa, ang Ginoo ra igo na! (Sta. Teresa of Avila). Sa pagkatinuod lang, walay usa nga makasinati niini nga kahupnganan gawas kon siya dunay Ginoo sa iyang kinabuhi.

Sa imong pangutana, “Unsaon ko kini pag-pugong nga mura man ug mangatol ko ug dili ko makahimo sa pagka hook niining vanity?” Una sa tanan dapat masabtan nimo nga ang vanity naglakip sa sobrang garbo, self-idolatry, kanunay nga gusto tan-awon nga labing maayo kumpara sa uban, kanunay nga nangita og kumpirmasyon gikan sa uban. Ang vanity nagpasabot sab nga ang tanan walay kapuslanan tungod kay kini mahanaw ra. Dugang pa niini, nagagikan kini sa pagkawalay kaseguruhan (insecurity), busa, sa pagkatinuod, ang mga vain nga mga tawo, walay kaseguruhan.

Ang vanity kay gamhanan lang kung imo kining pasagdan, busa, dili gyud kini angay nga tugotan. Sa paghunong sa vanity, kinahanglan nga mohunong ka sa pagtandi sa imong kaugalingon sa uban. Naa kay imohang kaugalingong giftedness. Hinumdomi nga aduna kanunay mga tawo nga labaw pa ka maayo kaysa kanimo, ug sa parehas nga sitwasyon, naa sab mga tawo nga ikaw ang mas labaw ka maayo kaysa kanila. Magpabiling mapaubsanon. Hinumdomi nga kita usa ra ka gamay nga tulbok niining tibuok nga kalibutan.

Pagpalambo og kinaiya sa pagkamapasalamaton. Magmalipayon ug kontento sa unsay naa nimo tungod grasya ang tanan. Higugmaa ang imong isigkatawo ug mas magpakabana kanila, imbes nga mag-pokus pag-ayo sa imong kaugalingon. Pagtigom ug mga bahandi sa langit kay sa pagtigom og mga butang nga mahanaw ra. Labaw sa tanan, tugoti ang Ginoo nga maghari sa imong kinabuhi, kanunay magpabilin nga konektado Kaniya sa pag-ampo tungod kay giyahan ka Niya sumala sa Iyang kabubut-on. Pag-alagad Kaniya pinaagi sa pagserbisyo niadtong mga tawo nga imong mahimamat diha sa dalan sa imong pagpanaw sa kinabuhi dinhi sa kalibutan.

Hinaot nga ang atong Mahal nga Inahan magauban kanimo sa imong tinguha nga mahimong labaw pa alang sa uban, busa paghimaya sa atong Ginoo pinaagi sa imong kinabuhi.

God bless you more.
Ate Emz