Selebrasyon sa ika-59 nga Parochial Fiesta sa Diocesan Shrine sa Our Mother of Perpetual Help Parish

Niadtong Sabado, Hunyo 25, 2022 gipangulohan ni Most Reverend Medil Aseo, D.D. Obispo sa Diyosis sa Tagum ang santos nga misa.

“Maluluy-on nga Dios lig-ona ang among mga kahuyangan aron kami nga nagahandom sa santos nga inahan sa Dios makalingkawas sa among mga kasal-anan ug kalapasan tinabangan sa iyang mga pangamuyo,” kini ang pag-ampo nga gibungat diha sa pasiunang pag-ampo.

Tuod man kitang tanan misalig sa inahanong panabang ni Santa Maria, ug dili kita ang nagbuot-buot nga siya mamahimo natong inahan, sama nga iyang gisuginlan si Juan kita usab mga anak nga nangandoy sa iyang inahanong panabang.

Sa Pamalandong ni Abp. Medil, mapasigarbuhon niyang gibutyag nga dako ang ilang paningkamot uban sa kura nga mamahimong Diocesan Shrine kining parokya tinabangan sa mga Redemptorist nga dunay dakong debosyon sa Inahan sa Kanunayng Panabang. Sama sa mga parokyano siya usab dunay dakong debosyon sa patron ug duna nay mga kasinatian sa iyang panabang.

Sa katapusan, kon tan-awon kuno ang mga malulot nga mga mata ni Santa Maria samtang siya naggunit sa iyang anak nga si Hesus nagasulti kanato nga ania ang kaluwasan ug si Maria dili mutugot nga naay usa kanato nga dili maluwas ug dili makabalik ngadto sa Dios.