Ika-36 Ka Tuig Nga Kapistahan Sa Inahan Sa Kanunay’ng Panabang Gisaulog

Malipayon nga gisaulog sa mga GKK Servant Leaders (GSL’s) ug myembro sa Gagmay’ng Kistohanong Katilingban (GKK) Our Mother of Perpetual Help sa Panorama/Robinsons diin nahisakop kini sa Parokya sa St. Mary of the Perpetual Rosary ang ika-36 ka tuig nga kapistahan sa Mahal nga Patron nga adunay tema nga nagkanayon: “Magpabiling madasigon mag-alagad sa Kristohanong katilingban inubanan sa atong Patron, Inahan sa Kanunay’ng Panabang pinaagi sa makanunayong pagkamanggihatagon.”

Isip pagpangandam sa maong kapistahan sa Mahal nga Patron, Inahan sa Kanunay’ng Panabang nagsugod ang Novena/Kasaulogan sa Pulong sa Hunyo 16 hangtod Hunyo 24, 2022 sa alas 6:00 ang takna sa gabii. Ang Santos nga Misa gisaulog sa Hunyo 25, 2022 sa alas 6:30 sa gabii nga gipangulohan ni Rev. Fr. Dionisio C. Tabiliran, Kura Paroko sa St. Mary of the Perpetual Rosary Parish.

Sa homiliya sa Kura Paroko, gihatagan og gibug-aton ang hiyas ni Maria sa pagkamasinugtanon sa kabubut-on sa Dios nga mahimong inahan ni Hesus. (Lucas 26-38). Tungod sa pagtando ni Maria, natuman ang plano sa Dios alang sa kaluwasan sa sala.

Ang ikaduhang bililhong hiyas ni Maria ang pagkamaalagaron sa dihang gipahibalo sa anghel nga si Gabriel nga 6 ka bulan nagsabak si Isabel nga iyang ig-agaw. Wala igsapayan ni Maria ang hilabihan kalayo gikan sa Galilea kay buot siya mo serbisyo sa mga nanginahanglan. Mao kini ang hagit sa mga magtutuo: Andam ba kita motahan sa atong kaugalingon sa pag-alagad alang sa kalamboan ug kahiusahan sa katilingban ug sa pamilya isip modelo sa atong mga anak?

Pagkahuman sa Santos nga Misa adunay panagambitay ug programa nga gipahigayon diin nalipay ang tanan kay sulod sa kapin duha ka tuig tungod sa kahadlok sa pandemya karon pa nagkahiusa ug nagkahimamatay pag-usab ang mga myembro sa katilingban.

Nahitabo kining tanan tungod sa hugot nga pagtuo sa Inahan sa Kanunay’ng Panabang nga manlilipod. Sa kahibulongang paagi nagpadayon nga mauswagon ang katilingban lakip usab ang kapilya.

Sa katapusan, mapasalamaton si Fr. Diony sa kalampusan sa selebrasyon ug nanghinaut nga sama sa mahal nga patron, magpabiling mahigugmaon sa isig ka tawo ug labaw sa tanan sa atong Dios nga maloloy-on.

Viva Maria! Viva Jesus!

(Clinita Nartea, GKK SoCCom)