Ang Dakong Gugma sa Dios sa Tawo

Ika-15 nga Domingo sa Ordinaryong Tuig (July 10, 2022)
Dt 30:10-14 / Ps 69:14, 17, 30-31, 33-34, 36, 37 / Col 1:15-20 / Lk 10:25-37

Ang tulo ka mga personalidad nga gihulagway sa atong Ginoo nagpakita kon si kinsa kanila ang matuod nga silingan. Ang tulo ka mga personahe nagpaila nga silang tanan mao ang silingan sa maong tawo nga nahiagom sa mga kamot sa tulisan nga gibiyaan nga himalatyon. Apan kon atong lantawon pag-ayo ang maong sitwasyon, ang atong Ginoo wala lamang mangutana kon si kinsa kanila ang silingan sa maong tawo, kondili, kinsa kanila ang nagbuhat sa maayo, nga mao ang nahigugma sa Dios sa tibuok niyang kasingkasing, sa tibuok niyang hunahuna, ug sa iyang silingan sama sa iyang kaugalingon.

Kini nga paghulagway sa atong Ginoo dili usab halayo sa atong mga makita ug masinati diha sa paglawig nato sa panaw sa kinabuhi. Ang una nga milabay sa maong lugar nga diin nahitabo ang pagpanulis mao ang usa ka pari. Kon atong lantawon ang buluhaton sa pari sa panahon sa atong Ginoo, siya mao ang maghalad sa sakripisyo didto sa templo sa ngalan sa katawhan. Ang mga Hudiyo adunay kustombri nga kon ang usa ka pari makahikap sa dugo kini makapahimo kaniya nga dili takus nga mohalad sa sakripisyo o makapahimo kaniya nga hugaw. Apan tungod sa maong responsibilidad wala niya mahimo ang angay nga buhaton nga mao ang paghigugma sa iyang silingan, nga mao ang pagtabang. Mas gipasulabi niya ang iyang trabahoon kaysa pag-una sa pagtabang sa nanginahanglan.

Ang ikaduha nga miagi mao ang Levita nga nagbuhat usab sa ingon, nga mao ang pagtipas sa laing bahin sa agianan. Kon atong lantawon ang una ug ikaduha nga miagi sa maong agianan mga nagserbisyo sa templo. Silang duha nakasabot pag-ayo sa balaod nga gihatag sa Dios, apan wala nila buhata ang sibo ug angay nga buhaton sa maong sitwasyon, nagpabilin lamang kini sa ilang mga salabutan nga usa ka ideya apan wala makita diha sa ilang mga buhat.

Sa katapusan, ang usa ka Samaritanhon nahiagi usab niadtong dalana ug nakita niya ang maong tawo nga nagkinahanglan ug tabang, naluoy siya ug iyang giatiman. Kon atong mahinumdoman ang mga Hudiyo ug Samaritanhon dili maayo ang ilang relasyon tungod kay giisip sa mga Hudiyo nga ang mga Samaritanhon mga hugaw. Ang gipakita sa usa ka maayong Samaritanhon mao usab ang pagpakita sa Dios sa iyang dakong gugma diha kanato. Wala gisapayan sa Dios nga ipadala sa Amahan ang iyang Anak aron pagluwas kanato nga bisan dili unta kita angayan. Ato kining tipigan kining maong dakong gugma sa Dios diha sa atong kinabuhi sama sa pagtipig sa atong Mahal nga Inahan nga mao si Birhen Maria. Atong paningkamotan ang pagpuyo ug pagbuhat kanunay sa kabubut-on sa Dios diha sa atong kinabuhi nga maoy maggiya kanato sa dalan paingon sa tinuod nga paghigugma sa Dios ug sa atong isigkaingon. (Bro. Soren Abellanosa)