Pagtugyan sa Kaugalingon diha kang Kristo Hesus

Ika-14 nga Domingo sa Ordinaryong Tuig (July 3, 2022)
Is 66:10-14c / Ps 66:1-3, 4-5, 6-7, 16, 20 / Gal 6:14-18 / Lk 10:1-12, 17-20

Diha sa pagpaningkamot sa tawo adunay mga butang nga lisod gayod nga himoon sama sa paghatag sa iyang kinatibuk-ang pagsalig sa Dios. Bisan lisod usa kini sa labing taas nga bunga nga iyang makab-ot. Ang hingpit nga pagsalig dili kalit nga mahitabo sa tawo apan kini nagkinahanglan ug makanunayong pagtahan sa kaugalingon ngadto sa Dios nga maoy nag-imbita sa tawo nga magpalawom sa iyang pagtoo ngadto Kaniya.

Ang atong Ginoo nagpadayag diha sa atong ebanghelyo “Panglakaw kamo; tan-awa, gipadala ko kamo nga sama og mga nating karnero taliwala sa mga lobo.” Kini nga kamatuoran nagpadayag nga ang atong Ginoo nagpadala kanato sa usa ka tahas nga mao ang pagsangyaw sa maayong balita ug mosalig Kaniya sa tanang higayon sa atong kinabuhi. Kini naghulagway, nagpadayag nga ang misyon nga gisangon ni Hesus kanato dili nato matuman kon mosalig lamang kita sa atong kaugalingong kusog. Atong kanunay nga hinumdoman nga Siya nga maoy nagpadala kanato, maghatag kanato sa kusog nga atong gikinahanglan aron kita makalahotay sa panaw sa misyon. Ato usab nga timan-an nga dili mahitabo nga wala ang magbalantay sa karnero nga maoy iyang gisaligan sa tanan. Mao nga ang pagpadala kanato sa atong Ginoo ngadto sa tagsa-tagsa ka mga katilingban, panimalay o bisan asa man kita maabot, atong paningkamotan nga matuman ang gisangon sa Dios kanato ug dili kita madani sa mga haylo sa kalibutanong mga kalampusan, kahimayaan, ug mga bahandi kondili ang atong kasuod sa magbalantay nga mao si Hesus, ang maayong magbalantay, maoy atong kusog ug tingoha aron mahiapil kita sa listahan sa langit.

Sa katapusan, si Hesus wala lamang nagpadayag nga ang Iyang misyon magkinahanglan ug dakong kaisug, apan kini dili matuman kon wala Siya. Busa, mipadayon Siya sa pagtanyag sa praktikal nga pahimangno nga “Ayaw pagdalag puntil sa kwarta, ni bantal, ni sandalyas; ug ayaw pagtimbaya kang bisan kinsa diha sa dalan.” Kon atong tan-awon kining pulonga diha sa espirituhanon nga panglantaw, dayag nga atong madungog nga si Hesus nagsulti ug duha ka mga butang. Una, salig Kaniya sa iyang Diosnong paigo samtang nagpadayon ka sa imong misyon sa kinabuhi. Ikaduha, ipadayon ang pagpunting sa imong mga tumong ug ayaw padani sa mga lingla sa kalibutan. Ang pagdala ug kwarta o ang pagpakig-estorya nganha sa dalan, wala nagpasabot nga daotan o dili maayo nga mga ideya; apan, kinahanglan natong hinumdoman ang mas lawom nga espirituhanong kahulugan sa pagsalig ug determinasyon sa pagtuman sa gisangon nga misyon kanato aron dili kita mawala sa atong tinuod nga padulngan. (Bro. Soren Abellanosa)