Ika-59 ka tuig nga kapistahan ni San Antonio de Padua sa Agdao: Tigpanalipod, Paglaum ug Inspirasyon sa mga Parokyano

TIGPANALIPOD, PAGLAUM, INSPIRASYON. Mao kini ang kinamaayohan sa pagsaulog sa Ika-59 nga kapistahan sa parokya sa San Antonio de Padua, Agdao niadtong Hunyo 13, 2022.

Ang kinabuhi ni San Antonio de Padua mao ang sumbanan ug panig-ingnan sa kinabuhi sa matag magtutuo. Makanunayon nga kaisog ug hagit sa pag-atubang sa mga problema sa kinabuhi, ang tawag sa paghigugma ug pagpasaylo, ang pagpakabana alang sa panginahanglan sa uban, ang pag-atubang sa dako ug gamay nga krisis, ug ang atong mga tiil lig-ong nakatamak sa yuta sa hingpit nga pagsalig sa gugma ug pagsalig sa Makagagahum nga Dios.

Sama sa naandan, sa dili pa isaulog sa ika-59 nga kapistahan, gisugdan una kini og siyam (9) ka adlaw nga pag-ampo sa Santos nga Rosaryo, Novena ug Kinabuhi alang kang Sr. San Antonio de Padua, ug Misa niadtong Hunyo 4 hangtud 12, 2022 nga pinangulohan sa mga kaparian nga sila Reberendo Padre Amado B. Arroyo, Reberendo Padre Reyjie C. Penecios, AJC, Reberendo Padre Zaldy Abonales, Reberendo Padre Emmanuel Gonzaga, Reberendo Padre Leonardo Dublan Jr., Reberendo Padre Alfredo Bustamante, Jr., Reberendo Padre Louis Jasper Alfeche ug Reberendo Padre Marvin Del Campo.

Niadtong Hunyo 13, Lunes, Kapistahan sa among pinalanggang patron San Antonio de Padua, gisugdan ang maong kasaulogan pinaagi sa Santos nga Misa sa ala sais sa buntag nga gipangulohan ni Rev. Fr. Reyjie Penecios, AJC, Resident Priest sa parokya, inubanan sa iyang mga igsoong pari, gisugdan dayon kini sa alas otso nga Misa nga gipangulohan ni Reberendo Padre Amado Tumbali Jr., SJ, usa ka pari nga Heswita nga taga Agdao kauban ni Reberendo Padre Amado Arroyo, ang Kura Paroko sa parokya, kauban usab ang iyang mga igsoong pari nga Heswita ug Diyosesano nga taga Agdao usab. Sa pagkahapon, sa alas tres nga misa, kini gipangulohan sa atong Auxiliary Bishop sa Arkidyosesis sa Dabaw, Most Rev. George B. Rimando, D.D., inubanan nila Rev. Fr. Reyjie Penecios ug Rev. Oliver Ganas.

Sa homiliya ni Bishop George, iyang gitagaag bilil ang kamahinungdanon sa pagpanaw, paglawig sa atong kinabuhi apan kinahanglan nato og tigpanilipod, paglaum, ug inspirasyon pinaagi sa tabang sa atong patron, San Antonio de Padua. Dungag pa niya isip pagpasabot sa Ebanghelyo niadtong adlawa, “Kining kapistahan unta makadala kanato og pagpaubos, pagpakig-uli sa usag-usa.” “Don’t settle for the minimum, we [must] go beyond, tawhanon nga pamaagi, bisan dili sayon, uban sa panabang ni San Antonio, walay impossible.”

Ang misa sa alas singko sa hapon, mabungahon nga gipangulohan sa atong halangdong Arsobispo sa Dabaw nga si Most Rev. Romulo G. Valles, D.D. Sa pag-abot niya sa simbahan ug bag-o pa magsugod ang Santos nga Misa, malipayon siyang gi-abiabi sa mga talento gikan sa Sta. Ana Performing Arts Guild (SPAG).

Sa homiliya ni Arsobispo Valles, “We are moved, we are touched, we are inspired, we are strengthened by Saint Anthony. Karong pistaha, giimbitar kita to come to God, balik sa Dios, mahiduol kita pagbalik diha sa kahiladman sa atong kasingkasing.” Gidasig usab niya ang mga parokyano nga dili biyaan ang tanan nga mga kaparian, madre, ang tanang mga magwawali apan mahitabo lamang kana sa atong padayon nga pagtinabangay, ang gabay nato nga panaw sa Gingharian sa Dios.

Una natapos ang misa, gipangunahan usab ni Arsobispo Valles ang pagpadala sa mga myembro sa AdHoc Preparatory Committee isip pagpangandam sa espesyal nga ika-60 ka tuig nga Kapistahan sa parokya ni San Antonio de Padua ngari sa Agdao. Sigon pa ni Fr. Amado Arroyo, kining maong pagpadala nga gibuhat sa Arsobispo, magpakita unta sa kamahinungdanon sa responsibilidad nga ilang pagagunitan ug ang hagit kanila diha sa pag-alagad sulod sa usa ka tuig.

Dili mamahimong posible kining maong kapistahan kung wala ang mga maabtikon nga mga myembro sa nagkadaiyang 59th Parochial Fiesta AdHoc Committees nga gipangulohan ni Rev. Fr. Amado B. Arroyo isip Chairman ug Rev. Fr. Reyjie C. Penecios isip Assistant Chairman kauban ang mga myembro sa nagkadaiyang komitiba sama sa Steering, Finance, Program, Secretariat, Socio-Cultural, Worship, ug Food.

Sa katapusan, tataw gayud nga sa mga panahon nga kita nakahiagom sa kalisod, pagsulay sa kinabuhi, bisan pa man sa padayon nga krisis nga atong giatubang, anaa si San Antonio de Padua nagpabilin nga atong TIGPANALIPOD, PAGLAUM UG INSPIRASYON.

Pinaagi sa pangama ni San Antonio de Padua, ang Makagagahum nga Dios maghatag kanato sa Iyang panalangin sa atong panaw sa kinabuhi. (Justin Felicia | Parish SocCom, San Antonio de Padua)