Ika-6 Nga Anibersaryo Sa Pagbalik Sa Dxgn 89.9 Spirit FM

Atol sa kapistahan ni San Antonio de Padua ang anibersaryo sa atong radio nga DXGN 89.9 Spirit FM. Unom ka tuig nang naglanog-lanog sa kahanginan ang atong pagpakaylap sa maayong balita ug sama ni San Antonio de Padua kita usab mga magsasangyaw sa makabag-ong pamaagi ug panahon.

Isip pagsaulog niining selebrasyon adunay gipahigayon nga motorcade ang mga myembro sa Davao Catholic Riders kung diin pipila kanila mga staff usab sa maong estasyon. Sa alas dyes ang takna sa buntag sila nagsugod gikan sa San Pablo Parish Compound paingon sa dalang McArthur Highway padulong sa Magallanes St. hangtod sa J.P Laurel ug subay sa R. Magsaysay nga ang sangputanan sa Southern Philippines Medical Center.

Sa nakabalik na sila sa San Pablo Parish, sa alas dose, gipangulohan sab ni Arsobispo Romulo G. Valles ang misa pasalamat ug sa iyang pamalandong iyang gipaambit nga ang DXGN pinaagi sa panghunahuna ni kanhing Arsobispo Antonio Mabutas nahimugso. Ug karon ang estasyon nagsilbing modernong propeta alang sa mga katawhan sa Dios.

Tapos sa misa, gipahigayon usab ang pagbendita sa bag-ong opisina sa Davao Catholic Herald sa 2nd floor sa Davao Verbum Dei Media Foundation.

Mapasalamaton ang tanang mga myembro nga naglangkob sa DXGN sa tanang nagmakanunayon sa pagsuporta sa estasyon. Ang among panghinaot ug kahingawa nga kitang tanan gihapon, SAMA-SAMA TOGETHER, ALWAYS and FOREVER.