Simbahan sa Daditama Makiglambigit Kanunay sa Eleksyon

Ang simbahan sa Probinsiya sa Davao kon ang gitawag nga Davao, Digos, Tagum ug Mati (DADITAMA) nagdeklara nga makiglambigit sa matag eleksyon pinaagi sa pagpahigayon ug makanunayong political education ug pagpakatag ug mga volunteers.

Kini maoy nakab-ot atol sa ulahi ug unang higayon nga face to face nga panagtigom sa mga Obispo ug mga pastoral workers sa DADITAMA Hunyo 7-8, 2022 nga gipahigayon sa Cogon, Digos City, Davao del Sur.

Unang gihisgutan sa maong assembliya ang resulta sa kalambigitan sa simbahan sa milabay nga nasudnon ug lokal nga piniliay diin nagtaho ang matag dayosis pinaagi sa social action ministry ang naglihok sa mga gimbuhaton sa Parish Pastoral Council for Responsible Voting (PPCRV).

Nagmalampuson ang gihimong political education sa upat ka mga Dayosesis, ingon man sa pagpadala ug mga volunteers sa nagkalain-laing mga voting precincts.

Human sa mga gipasibaw nga mga na-obserbahan atol sa pagpahigayon sa eleksyon, gi-uyonan sa upat ka mga Obispo nga gilangkuban nila ni Arsobispo Romulo G. Valles, D.D. (Archdiocese of Davao), Bishop Guillermo Afable (Diocese of Digos), Bishop Medil Aseo (Diocese of Tagum) ug Bishop Abel Apigo (Diocese of Mati), nga sa matag eleksyon, himoon gihapon ang paglambigit sa simbahan sa Probinsiya sa Dabaw pinaagi sa political education, voters assistance, documentation and news reporting, ug isip otorisadong representante sa citizen arm sa Commission on Elections (COMELEC), PPCRV volunteer.

Ning tuiga, sanglit serado ang kasagarang mga tulunghaan, ang Davao Association of Catholic Schools (DACS), ang gi-recognize sa PPCRV alang sa Probinsiya sa Dabaw, nagpahigayon sa circles of discernment sa mga tulunghaan ug sa mga parokya pinaagi sa pakig-coordinate sa mga social action ministry nga maoy nag-tap sa mga volunteers gikan sa mga parokya.

Tinguha sa DADITAMA nga sa mosunod nga mga eleksyon, nga dili na isangon ang tanan nga mga kalihukan sa piniliay sa social action ministry apan, mismo ang mga parokya ang mopadagan sa pagpangandam ug pagpahigayon sa gimbuhaton sa PPCRV.

Himoon na usab gilayon ang pagpadayon sa political education pinaagi sa pag-lakip niini sa mga modules sa formation ministry sa level sa parokya isip tubag sa komentaryo nga kulang ang pagpangandam ug pagpakatag sa circles of discernment.

Gipanghinaot usab sa maong body nga pinaagi sa circles of discernment, motuhop gayod ang mga pagtulon-an sa simbahan sama sa Kristohanong mga hiyas ilabi na sa dili pagbaligya sa boto.

Matod sa COMELEC nga wala pay kausaban sa iskedyul alang sa piniliay alang sa Barangay ug Sangguniang Kabataan nga ipahigyaon sa bulan sa Disyembre.