Bunga sa 50 ka Tuig sa GKK

Ang tibuok Arkidayosis nag timbaya dinha sa ika-singkwenta nga anibersaryo sa pagsugod sa mga Gagmayng Kristohanong Katilingban dinhi sa Davao. Duyog sa Tema, “GKK Gasa sa Dios sa Davao: Nanag-uban sa Panaw sa Diwa sa Pagkapiniyalan, 50 Anyos na sa Misyon.”

Nagsugod kining triduum adlawng Byernes sa pagpahigayon sa Kasaulogan sa Pulong gamit ang pasiuna ug mga pag-ampo nga nag punting sa pasalamat sa pagka “gasa” sa kamugnaan sa GKK. Dili ikalimod ang dakong tabang sa pagduol sa simbahan sa mga katawhan. Ang pagtukod niining mga katilingban nga gisimbolo sa mga kapilya, naghatag ug dakong bili sa pag-amuma sa simbahan diha sa iyang kagustohan nga mapaduol sa katawhan.

Ug diha sa pag-apil namo sa KSP sa GKK sa Imaculada Conception nga sakop sa San Pedro Calungsod Parish Baguio District akong nahimamat ang ilang batan-on nga PSL nga si Ken Lynard Leones sa iyang pangedaron nga disi-nwebe siya upat ka tuig nang nangalagad sa ilang GKK. Tuod man dili siya gikan niining kapilyaha apan mas labaw nga nakita ang iyang kadasig sa pagtabang sa ubang kapilya.

Akong gisusi ug unsay nakapa-aghat kaniya diha sa pagpangalagad ug kini ang iyang tubag, “Sa linghod nga pangedaron, ako nakamatngon na sa pagpangalagad sa Simbahan tungod sa akong pamilya (ilabina sa akong Lola) ug mga higala nga nag-alagad na sa among katilingban. Ug sa akong pagdako, nahimo nako silang sumbanan aron mualagad usab ako sama kanila, ug kay sayod usab ako nga kini mao ang tawag sa Ginoo alang kanako. Naaghat ako sa pag-apil sa ministriya sa Pangulo sa Liturhiya (PSL) tungod sa panginahanglanon (o maingon nato nga kakulangan sa mga PSL) sa among GKK, nagsugod ako sa pangedaron nga kinse anyos. Nangayo ako ug pagtugot sa among Parish Priest nga si kanhing Fr. Ricky Flores ug sa among PSK nga si Ma’am Anneza Pacomios ug kini ila dayong giuyonan ug gikalipay pag-ayo tungod kay dili kaayo nato makita nga adunay mga batan-on nga PSL sa usa ka GKK. Miapil ako sa mga seminars, workshops ug uban pang mga kinahanglanon aron mamahimong sakop sa maong ministriya ug aron makaalagad na sa among kapilya hangtod karon. Sa akong pangedaron karon, nakadani na usab ako ug mga kabatan-onan nga akong ka edad sa pagpangalagad sa among Simbahan (Parokya/GKK) sama sa pagbasa sa Pulong sa Dios, ug ang uban nag Altar Server ug myembro sa choir. Ug ang kanunay kong ginatambag kanila nga sa bisan unsa pa mang mga pagsulay ug kasakitan nga ilang masinati diha sa pagpangalagad, padayon lang silang moalagad kay kini mga hagit ug pagsulay lamang sa kinabuhi isip tawo nga gihatag sa Dios kanato aron masulayan unsa kalig-on ug kahugot ang atong pagtuo ug pagsalig kaniya”.

Ako gayong nabati ang kalipay nga pipila ka mga GKK karon daghan nang mga kabatan-onan ang nagsugod sa paghalad sa ilang mga kaugalingon ug kini, kini ang maingon natong bunga sa singkwenta ka tuig nga hinagoan sa atong mga lideres ug mga myembro sa mga Gagmayng Kristohanong Katilingban.