Kinakausap Lang Kita Kapag Ako’y Nangangailangan

Dear Ate Emz,

Ang akong ipaambit mao ang mga panghitabo nga dili nato ika limud nga kasagaran mao gayud ang atong ginahimo. Kasagaran man gud nato manawag ug assistance, tabang sa atong Diyos Amahan ilabi na nganha sa kalisod o kung dunay suliran. Apan gani kon okay ang tanan murag wala lang.

Ang akoa man gud, sa dihang dunay bation, sakit o dili maayong panglawas, sangpit dayun ko kang Hesus. Unya gani pag okay ang tanan kining mura ba ug tawo o kaila nga higala nga anaa lang sa haduol nga dapit apan daw way nakita.

Makaulaw nga sa tumang kaharuhay o kalipay walay lingiay apan sa mga pagsulay o kagul-anan sangpit dayon taman sa ginhawa. Mao kini akong kinaiya nga gusto nakong bag-uhon. Selfish ra kaayo ko. Dili nako gusto nga pamarisan ako sa akong duha ka anak nga mga gagmay pa. Hinaot ako nga ilhon ako nila nga maayo nga tatay ug amahan sa among panimalay, ug bana nga angayan sa akong asawa. Hinaot pa unta.

Daghang Salamat,
Aying

* * * * * *

Dear Aying,

Kung maghisgot ta bahin sa matang sa mga higala o uban pang mga relasyon, ang imong tinamdan mahimong ikumpara sa usa ka fair-weather-friend nga magpakita lang kon kinahanglan nimo ang usa ka butang gikan niya. Ug kon mahitungod sa relasyon sa atong Ginoo, kini mao ang paghangyo, paghangyo ug dugang pang paghangyo! Dili lang naman ikaw ang adunay ingon niini nga batasan. Daghan kanato aduna niini nga matang sa kinaiya sa atong pag-ampo.

Unsa ba gyod ang pag-ampo? Kini mao ang pagbayaw sa atong mga kasingkasing ug hunahuna ngadto sa atong Ginoo nga nahigugma kanato. Hinumdomi nga ang pag-ampo dili lang limitado sa paghangyo. Sa pagkatinuod ang pag-ampo naglakip sa Adoration (pagsimba), Contrition/confession (paghinulsol), Thanksgiving (pagpasalamat), ug Supplication/petition (pagpangayo). Sa laktod, A.C.T.S. Aron dali lang nato mahinumdoman, hunahunaon lang nato kining mga letra aron kita magiyahan kon unsay iapil sa atong mga pag-ampo. Ang pagsimba mao ang paghatag og dungog ug pagdayeg sa atong Diyos kay Siya ang Ginoo sa tanan. Ang pagkumpisal o paghinulsol mao ang matinud-anong pag-atubang sa sala sa atong kinabuhi, ang pagpangayog pasaylo ug pagpasaylo sa uban. Ang pagpasalamat usab mao ang atong pagpahayag nga mapasalamaton kita sa tanang mga panalangin nga gihatag sa Dios sa atong kinabuhi ug sa tanang naa sa atong palibot. Ang pgpangayo o petisyon naglakip sa pag-ampo alang sa atong mga panginahanglan ug sa mga panginahanglan usab sa uban. Hinumdomi nga usa sa labing nindot nga pag-ampo nga naglakip niining mga elemento mao ang AMAHAN NAMO nga gitudlo mismo kanato sa atong Ginoong Hesukristo! Ug siya uban kanato sa dihang ato kining iampo sa atong Diyos Amahan.

Walay laing matang sa pag-ampo nga labaw pa sa ubang mga pag-ampo gawas sa Santos nga Misa o Sakramento sa Eukaristiya. Maghunahuna ka sa bisan unsang labing kataas nga numero nga imong mahanduraw nga magrepresentar sa bisan unsang mga debosyonal nga mga pag-ampo, apan kining tanan dili gyod makatumbas sa mga merito sa Santos nga Misa. Kini tungod kay si Hesus, sa Iyang kaugalingon, mao ang atong Labawng Pari, ang atong hingpit nga halad ug pagsimba ngadto sa atong Makagagahom nga Amahan, busa, labing makapahimuot Kaniya. Dugang pa niini, ug labaw sa tanan, gihiusa nato ang atong kaugalingon kang Hesus, ang Tinapay sa Kinabuhi, samtang gidawat nato Siya, panahon sa Balaang Komunyon. Mao nga labawng maayo nga kanunay kita makatambong ug aktibong moapil sa pagsaulog sa Santos nga Misa, tungod kay kini ang pinakataas nga porma sa pag-ampo ug pagsimba (worship) sa Ginoo.

Aron makab-ot ang pagbag-o sa imong kinabuhi sa pag-ampo, kinahanglan nga mahimong mahunahunaon ka sa mga elemento niini. Tun-i ang kinaiya sa pagpasalamat kay grasya man ang tanan…kalipay man ug kasakit sa kinabuhi. Himoa nga ang imong relasyon uban sa Ginoo alang sa tanang panahon, dili lamang sa panahon sa panginahanglan. Pagsugod na dayon sa pag-agak sa imong tibuok pamilya sa atubangan sa inyong altar ug mag-ampo sa di pa matapos ang kada adlaw. Pag-uban mong tanan sa pagtambong sa Misa, labing menos sa mga Dominggo ug mga holy days of obligation kung dili kamo makatambong sa kanunay. Ug ayaw paglangan…pagsugod NOW NA!

Kauban sa atong Bulahan nga Inahan, hinaot unta nga ang inyong kinabuhing pag-ampo mamahimong molambo karon labaw pa sa kagahapon ug himayaa ang atong Ginoo sa inyong kinabuhi.

God bless you more.
Ate Emz