Tubag nga Lig-on ug Matinud-anon!

Ika-13 nga Domingo sa Ordinaryong Tuig (June 26, 2022)
1 Kings 19:16, 19-21 / Ps 16:1-2, 5, 7-8, 9-10, 11 / Gal 5:1, 13-18 / Lk 9:51-62

Tulo ka panghunahuna ang atong makatagbo ning atong ebanghelyo karong adlawa. Silang tulo gitawag ug buot silang mosunod kang Hesus. Kitang tanan gitawag, sama kanila ug usab adunay kapasidad ug abilidad nga motubag niining tawag sa Dios. Kita ug sila makahimo niini, apan sama usab kanila, adunay nagkalain-laing panghunahuna ug usahay walay hustong hinungdan aron magma-lig-on ug magmatinud-anon sa atong tubag.

Una: Si Hesus nagpahinumdom sa tawo ug kanato sa pagpamalandong pag-ayo sa atong pagtubag kaniya. Buot Siya nga sa kanunay andam kita sa pagsakripisyo ug sa mga kalisod nga pagasination niadtong mahimo niyang mga tinon-an. Ang pagsunod Kaniya nagkahulogan ug pagpas-an sa krus ug pagkamatay. Nagsugyot kini sa pagtalikod sa kaugalingong gusto ug paghatag sa tanan alang sa Dios ug sa pag-antos.

Ikaduha: Ang talikala sa pamilya ug mga obligasyon dili balidong rason sa dili pagtubag sa tawag sa Dios. Tuohi nga ang Dios ang bahala sa tanan natong panginahanglan sa kalibutan. Siya ang nag-amuma sa kalibutan, nganong dili man Niya maamumahan ang atong mga ginikanan o mga kaparyentehan. Busa Siya gayod diay ang angayang unahon ug wala nay lain pa sa atong kinabuhi. Ang mga bulohaton sa Dios mao ang unang prioridad og obligasyon sa tawo nga gitawag alang sa misyon sa Dios. Bisan kinsa o bisan unsang mga butang dili mahimong mahiuna kaysa sa Dios.

Ikatulo: Ang buhat sa Dios dinalian ug kinahanglanon kaayo. Tataw kayo ang iyang tawag kinahanglan kita Niya karon dayon, busa buot Niyang magdali usab kita pagtubag ug biyaan ang tanan bisan gani ang mga relasyon sa pamilya. Karon dayon daghan ang nagkinahanglan sa atong pagsangyaw ug kon mahimo, magdali kita. Kinahanglan nga walay laing trabahuon kondili ang Iyang ipatrabaho kanato.

Busa matod pa sa usa ka awit nga gisulat ug gihimoag awit ni Narcisa Fernandez:”Dili sayon ang pagsunod kang Kristo, daghang tunok ang dalan nga agian mo. Bug-at ang krus nga pas-anon mo ug kamatayon naghulat kanimo…” Amen!