Mapasalamatong Pagsaulog sa Ika-6 nga Anibersaryo sa DXGN

Bisan tuod anaa pa kita panahon sa pandemya, nagpadayon gihapon ang DXGN kauban ang atong walay puas nga mga tigsuporta ug tigpaminaw.

Ugma adlawng Lunes, Hunyo 13, ubay-ubay ang kapistahan ug importanteng mga selebrasyon nga atol usab sa atong pagsaulog niining anibersaryo. Tungod kini man ang adlawng natawhan sa anhing Arsobispo sa Dabaw, Abp. Antonio Mabutas nga maoy nagpasiugda sa Bishop Thibault Media Center. Atong gitagaan ug bili ang iyang hago sa pagpanguna niining atong DXGN karon. Ug sa padayag sa atong kasamtangang Arsobispo sa Dabaw, Abp. Romulo G. Valles, D.D. panahon sa iyang Shepherd’s time sa milabay nga Presbyterium Meeting, ato kunong saulogon kining adlawa, Hunyo 13 isip lokal nga selebrasyon sa Social Communications Day tungod usab atol niadtong World Communication Sunday ang dakong selebrasyon sa Pagkayab ni Hesus sa Langit ug wala kaayo nato matagaan sa dakong pagsibya ug pagtimbaya ang atong garbo sa pagpakaylap sa maayong balita. Sulod niining adlawa, among gipasalamatan ang tanang misuporta ug padayong gasuporta sa DXGN dili lamang sa mga tabang pinansyal apan labi na sa mga pag-ampo ug pagpatronize sa atong estasyon.

Kaninyong tanan, daghan kaayong Salamat! Dalaygon ang Dios hangtod sa kahanturan.