“Santacruzan 2022: Ang Laag Nga Langitnon”

Ang Flores de Mayo kay usa sa mga espesyal nga selebrasyon sa simbahang Katoliko, nga mao ang paghalad ug bulak sa atong Bulahang Inahan nga si Birheng Maria.

Kini mao ang bulan sa pagpamulak sa mga nagkalain-laing mga buwak nga atong makita sa atong palibot ug paghinumdom sa kamaayo sa atong inahang Birheng Maria.

Gisugdan ang selebrasyon sa usa ka misa nga gipangulohan og selebrar sa kura paruko sa maong simbahan nga mao si Rev. Fr. Rolando O. Mandreza, DCD.

Sa pasiunang mensahe ni Fr. Lando, nalipay gayod siya sa iyang nakita, sa mga arko nga mga anindot ug sa mga babayeng nagrepresenta kay Birheng Maria.

Gipaambit ni Fr. Lando ang Kinabuhi ni Berheng Maria sa pagbisita niya sa iyang higala nga si Isabel.

Miingon siya “Mao kini ang usa ka laag ni Maria nga iyang gidala sa iyang sabakan ang batang Hesus. Mingbaktas siya sa usa ka halayo nga distino ug dala niya ang gugma ug kalinaw para sa tanan. Kini mao ang higayon nga ming-ulpot sa kalipay ang bata sa sabakan ni Isabel ug sabakan ni Maria sa ilang pagkakita sa matag usa. Dinhi ato gayong makita nga kalipay, paglaom ug gugma gayod ang gisabak ni Maria. Ug iyang mga laag konektado kang Hesus, ang laag nga langitnon”.

Gipaambit pud ni Fr. Lando, nga kita untang tanan, mahisama kang Maria, maglaag ug mag lakaw uban ang gugma ug kalinaw ni Kristo, ug dili lang maglaag-laag nga walay pulos ug lakbay nga makadaot sa atong kinabuhi, “unta atong mahikat-onan ang paglaag nga dala ug bitbit ang gugma ug kamaayo ni Kristo, laag nga konektado gayod kaniya: laag nga Langitnon”.

Ang Santacruzan 2022 kay ang pinakauna nga santacruzan nga nahitabo sa Parokya ni ST. JAMES, mao lipay kaayo ang tanan sa pagkakita sa maong parada.

Nag-una sa parada ang DRUM AND LYRE nga gikan sa Bernardino Bosque National High School, ug inubanan sa mga polisya sa Bunawan ug mga barangay tanod nga mao ang nagpahapsay sa maong parada.

Nahuman ang maong parada ug mingbalik aron sa pag hatag ug tokens of appreciation ug pag ganti sa pinaka anindot nga arko.

Ug lagi ang nakadaog sa maong “Best Arch” mao ang STO. NINO GKK nga napuno ug suga ug preskong mga bulak.
Ug gikoronahan nga Reyna Elena ang representante gikan sa Zone 1, Sr. San Roque.

Ang maong santacruzan dili gayod mamahimong possible kung dili sa pangulo ni Seminarian Keyt Banag og Seminarian John Darrel Rillo, tungod gayod sa ilahang mga maabilidadong panghuna-huna nahimong possible ang maong selebrasyon,
ug inubanan sa tabang gikan sa PSB nga gipangulohan ni Obed Quintano, sa SOCCOM, ug ilabi na sa kora paruko sa maong simbahan, Rev. Fr. Rolando O. Mandreza.

Nahuman gayod ang selebrasyon sa Flores De Mayo ug Santacruzan nga malipayon ug malinawon, kining tanan gayod ginapasalamatan sa panabang sa atong Inahang Berheng Maria sa atong Buhing Diyos, Ginoong Hesus. (Angelo P. Marqueza | St. James the Great Apostle Parish of Bunawan)