Panaghiusa sa Amahan, Anak, ug Espiritu Santo

Solemnidad sa Santisima Trinidad (June 12, 2022)
Prov 8:22-31 / Ps 8:4-5, 6-7, 8-9 / Rom 5:1-5 / Jn 16:12-15

Karong adlawa, atong gisaulog ang Solemnidad sa Santisima Trinidad. Human sa Panahon sa Pasko sa Pagkabanhaw, human sa paghinumdom sa panghitabo sa Pentekostes nga nagbag-o sa bunyag sa Simbahan diha sa Balaang Espiritu, atong ipunting ang atong panan-aw, maingnon ta, ngadto sa “abli nga mga Langit”, sa pagsulod uban sa mga mata sa pagtuo ngadto sa kahiladman sa misteryo sa Dios, usa ka substansiya sa tulo ka Persona: Amahan, Anak ug Espiritu Santo.

Ang Santisima Trinidad usa ka kamatuoran nga gipadayag sa atong Ginoong Hesus ug gipadayon pagtudlo sa Simbahan. Gani sa dihang miingon ang Ginoo “Ang tanan nga Iya sa Amahan Akoa usab…” kini nga hulagway usa ka pagpadayag nga diha sa Dios anaa ang kahiusahan. Apan tungod sa kalawom niining kamatuoran nga naglibot sa misteryo sa Dios dili gayod nato matungkad kining maong kamatuoran. Apan wala kini magpasabot nga kining maong kamatuoran dili nato mahibal-an, apan sa pagkatinuod ang Dios na mismo ang nagpadayag kanato niini. Si Hesus nga gikan sa Dios ug nanaog sa kalibutan aron mosaksi niining maong kamatuoran.

Gipadayag ni Hesus kanato ang misteryo sa Dios: Siya, ang Anak sa Dios, nagpaila kanato sa Amahan nga atoa sa Langit, ug naghatag kanato sa Espiritu Santo, ang Gugma sa Amahan ug sa Anak. Ang Kristohanong teolohiya naghiusa sa kamatuoran sa Dios niini nga ekspresyon: usa lamang ka substansiya sa tulo ka persona. Ang Dios dili nag-inusara, apan hingpit nga panag-uban. Niining maong kamatuoran kita makasinati sa presensya sa Amahan, ug sa Anak pinaagi sa pagtudlo sa Espiritu Santo kabahin sa kamatuoran ug kita isip mga hulagway sa Dios makaabot ngadto sa paghiusa kanunay sa atong tumong ug tingoha sa atong kinabuhi.

Diha sa atong adlaw-adlaw nga paghimamat kang Kristo ug sa atong pakighigala kaniya ug pagdawat diha sa atong kasingkasing ang kahiusahan sa Santisima Trinidad mismo, sumala sa saad ni Hesus ngadto sa iyang mga disipulo: “Kon ang usa ka tawo mahigugma Kanako, siya magabantay sa Akong pulong, ug ang akong Amahan mahigugma kaniya, ug Kami moadto kaniya ug mopuyo uban kaniya” (Jn 14:23).

Dugang pa niana, ang kamasinugtanon ni Hesus sa mga sugo sa Amahan makita kaayo diha sa iyang kasuod sa Amahan, sa ingon kita gitawag kanunay nga mahimong mga higala ni Hesus ug mga saksi sa Iyang kamahigugmaon sa kabubut-on sa Amahan. Atong ablihan ang atong mga kasingkasing sa tukma niining adlawa aron ang atong paningkamot nga mahiusa diha kang Hesus motubo usab sa atong kinabuhi, sa ingon makahimo kanato sa pagsaksi sa iyang kamasinugtanon, kaayo ug kamatuoran.