Paghinumdom sa Kapistahan ni San Jose Marello Gisalmutan sa mga Kabatan-Onan sa San Fransico De Asis Parish – Tagakpan

Kapin 302 ka mga batan-on nga gikan sa 26 ka mga GKK o Gagmayng Kristohanong Katilingban nga sakop sa San Francisco De Asis Parish ang misalmot kaniadtong Mayo 29, 2022 sa gipahigayon nga paghinumdom sa kapistahan ni San Jose Marello o Guiseppe Stefano Chiaffredo Marello.

Human sa Santos nga Misa nga gipangulohan sa Spiritual Director sa JMY-Davao na si Rev. Fr. Jeffrey Dinglasan, OSJ, gisundan dayon kini sa lecture mahitungod sa “Kinabuhi sa Pagserbisyo ni San Jose Marello” nga gihatag ni Ryan A. Cafe, kanhing Seminarian sa Oblates of St. Joseph ug kanhing Joseph Marello Youth o JMY President.

Nahimo usab nga makalingaw ang gipahigayon nga Marello day tungod sa giandam sa mga JMY Officers nga mao ang Group Dynamics nga gipangunahan sa JMY President na si Jessa Mae Sayre.

Dungan sa Marello day, gipahigayon usab ang bag-ong pagpanaad alang sa mga altar servers ug Marellets, ingon man ang JMY officers timaan sa ilang pagpadayon sa Pagserbisyo sa simbahan ilabi na sa Dios.

Gitapos ang adlaw sa usa ka nobena pahinungod kang San Jose Marello.

Si Giuseppe Stefano Chiaffredo Marello o mas nailhan na San Jose Marello gipanganak kaniadtong Disyembre 26, 1844 sa Turin, Italy. Disyembre 1868 nakasinati og grabi nga sakit si Jose Marello ug nagpakita ang Mahal nga Birhen Maria ug giingnan siya nga mamaayo lamang siya kung mobalik siya sa seminaryo. Nahimong Pari ug Obispo si Jose Marello. Gikan paman pagkabata ni Marello nagsugod na ang lawom nga debosyon niya sa mahal nga Birhen Maria ug kay San Jose, bana ni Maria. Si Jose Marello usab ang nagtukod sa kongregasyon na Oblates of St. Joseph kaniadtong Marso 14, 1878. Namatay si Jose Marello niadtong Mayo 30, 1895 sa Savona, Italy.

Si Papa Juan Pablo II, niadtong ika-13 sa Marso tuig 2001, atol sa usa ka publikong ordinaryo nga konsistoryo alang sa kanonisasyon sa mga bulahan, solemneng mipahayag nga ang bulahan nga si Jose Marello maapil na sa listahan sa mga Santos. (Bay-Jay F. Teon)