Tapolan Ko

Dear Ate Emz,

Ang kinaiya sa tao nagkalain-lain. Dunay nindot duna sab ngil-ad. Sa akong kabahin makaingon ako ug 50/50 akoa niini. Angkon ako nga dili ako tantong nindot og pamatasan.

Sa among panimalay, lima kami nga nagpuyo, akong mga ginikanan, ug tulo nako ka igsoon. Ako ang ika duha, 30 anyos ug batan-on pa. Among kamaguwangan tua sa abroad nagtrabaho ug ako walay trabaho. Among kamanghuran anaa pa sa grade 12 sa kasamtangan. Aduna kami gamayng tindahan nga gi-atiman sa akong mga ginikanan.

Medyo pabor kanamo ang panahon tungod wala kaayo kami naglisod karong panahona kay lagi okay ang dagan sa panginabuhian. Ang kapait lang kay mura ba ug gasalig lang ako sa mga abot sa akong igsoon ug sa among gamayng tindahan. Hayahay kaayo kay kung unsay akong gusto mura ba ug makuha nako dayun. Hinoon gatabang-tabang ako sa mga lihokunon sa panimalay apan usahay motukar akong ka tapulan.

Kung buot huna-hunaon duna na sab akoy kaugalingong kapangitaan pero nagsalig lang gihapon ako sa akong mga ginikanan ug mga padala sa akong igsoon gikan sa gawas.

Unsa may akong himoon nga mawala ang akong kinaiyang tapulan?

Daghang Salamat,
Brando

* * * * * *

Dear Brando,

Subo kaayo ang mahibal-an nga sa usa ka pamilya, naay miyembro nga tapolan molihok. Kasagaran mahimong problema kini sa ginikanan. Hinuon, kung ikaw ang gitumong niini, Brando, bisan pa sa imong mga kakulangan, naa gihapon angay’ng ipasalamat tungod sa imong pag-ila, pag-angkon ug pagdawat nga kini usa sa imong negatibong kinaiya. Sa kini nga kahibalo, mahimo nga maplano na nimo ang mga lakang kung unsaon pagbuntog niining dili maayo nimo nga batasan.

Ang ORAS usa ka mahinungdanong gasa nga dili na nato mabawi kung kini mawala na. Sa imong panuigon nga 30 anyos, dili ka na usa ka bata ug dili gyod ka magpabilin nga ingon ani samtang paspas ang pagdagan sa oras. Ang ubang mga indibidwal nga imong ka-edad produktibo na ug independente nga nagpadayon sa ilang mga karera o di kaya adunay ilang kaugalingon nga mga pamilya.

Ang pagkatapulan maoy usa sa pito ka mga sala nga kapital. Usa kini ka kapakyasan sa pagbuhat sa mga butang nga kinahanglan nimong buhaton, o ang paglikay sa trabaho. Ang pagkatapulan usa sab ka hinungdan ngano ang indibidwal mohunong sa pagtubo isip usa ka tawo. Dugang pa niini, ikaw mahimong kabos tungod kay ang kakabos bunga sa padayon nga sala sa pagkatapulan.

Nag-ingon ka nga naa kay kaugalingong kapangitaan apan nagsalig lang gihapon ka sa imong ginikanan ug sa padala sa imong igsoon. Unsaon na lang kung wala nay trabaho ang imong igsoon? Unsaon na lang kung mawala na ang imong mga ginikanan? Mao bitaw nga gigasahan ka sa Ginoo og mga talento aron kini magamit nimo pag serbisyo sa Iyaha pinaagi sa imong pagserbisyo sa uban. Hinumdomi nga gusto sa atong Ginoo nga magkinabuhi ka nga madagayaon ug mas bug-os kini. Mao na nga pinaagi sa pagpaambit sa imong talento, ubanan pa gyud sa gugma, sigurado gyod nga mo-asenso ka ug motubo ka sa imong pagkatawo.

Gikinahanglan ang mga paningkamot aron maani ang imong ganti. Ayaw pagdahom nga ang tanan ihatag kanimo sa usa ka silver platter nga dili ka molihok alang niini. Busa, usa kini ka dako nga pakigbisog aron mabuntog ang pagkatapulan. Nanginahanglan og trabaho, pagpasensiya, ug paglahutay aron yanong mabuhi! It takes a lot of will power to end this war going on within yourself. Everyday you just have to die to this laziness!

Bahin sa imong pangutana; “Unsa may akong himoon nga mawala ang akong kinaiyang tapulan?” Una sa tanan, kinahanglan nga aduna kay lig-on kaayo nga determinasyon nga magbag-o, klaroha ang imong tumong ug katuyoan sa kinabuhi. Sa laing pagkasulti, tinoa kung unsa gyud ang imong gusto mahitabo sa imong kinabuhi. Mao kini ang magpalihok nga kusog ug kadasig sa imong pagbangon, pagpaningkamot sa pagbuhat sa kinahanglan nimong buhaton. Himoa ang imong mga tumong nga madumala ra nimo. Paghimo og plano sa aksyon nga imong buhaton ug gamita ang imong kusog, kahanas ug talento.

Usahay sa imong plano nga mobag-o, makasulti ka “KAYA NAKO NI”. Kung imong sutaon niining mga pulonga, usahay walay mahitabo. Apan kung mosulti ka nga “BUHATON NAKO NI” naay kusog nga determinasyon, busa, naa gyod mahitabo nga buhat. Nanghinaot ko nga imong maamgohan ang kalainan tali sa duha ka pahayag.

Hinuon, magkinahanglan og panahon aron sa katapusan maporma nimo ang bag-ong batasan ug hingpit mapulihan ang daan. Unya kung bisan unsa ang imong maayong nahimo, ilha kini aron mabati sab nimo nga milampos ka, ug mahimo nimong gantihan ang imong kaugalingon.

Hinaot unta nga mahimong makanunayon ka sa imong pagpaningkamot sa pagbag-o . Bisan pa, pagmabinantayon ug pagmatngon kay ang daotang espirito motrabaho sab og pag-ayo sa pagtintal kanimo sa pag-atras ug pagbalik sa daan nga batasan. Busa, ampingi kanunay ang imong kaugalingon sa makanunayon ug mainitong pag-ampo tungod kay kini mao lamang ang atong kusog. Sa ingon, ug kauban ni Maria, ang Inahan sa Kanunay’ng Panabang, hinaot nga mahimo kang mas maayong tawo karon labaw pa sa kagahapon!

God bless you more.
Ate Emz