18th kapistahan sa Queen of Peace GKK sa OLLP gisaulog

Ang GKK Queen of Peace sa Our Lady of Lourdes Parish sa Bangkal nagsaulog sa ika-18 nga tuig sa kapistahan niadtong Mayo 14, 2022.

Ang misa sa kapistahan gipangunahan sa OLLP Kura Paroko nga si Fr. Henry Campeon, DCD, inubanan ni Fr. Jerson Balili, SDV, ang bag-ong inordinahan nga pari nga taga Alzate, Matina Crossing, sakop sa OLLP.

Dako ang kalipay ug kasadya sa mga taga GKK Queen of Peace nga gipangulohan sa PSK nga si Salvador Ibabao, kay sa unang higayon adunay “first communion” nga gihimo sa kapilya sa duha ka bata nga mga miyembro sa maong GKK. Aduna usab tulo ka mga batang gibunyagan human sa misa nga gi-ministrohan ni Fr. Balili.

“Salamat, Maria, Rayna sa Kalinaw, sa dakong paghigugma ug sa pagprotekta sa among Gagmayng Kristohanong Katilingban bisan pa man sa atong giatubang nga pandemya,” komento ni PSK Ibabao nga puno sa kalipay.

“Si Maria, isip atong Inahan ug Rayna sa Kalinaw, mamahimo unta nga atong sumbanan aron magpabilin ang kahiusahan ug kalinaw sa atong tagsa-tagsa nga pamilya ug komunidad,” matud pa ni Fr. Campeon sa iyang homiliya.

Sa kanunay, gipangayo ang pag-ampo ni Santa Maria ngadto sa iyang Anak aron sa pagpanalipod sa mga taga GKK Our Lady of Peace.

VIVA MARIA! VIVA HESUS!

(Rowena B. Villaflor, OLLP SoCCom)