Pagtuo Ug Gugma Atong Kahayag Ug Giya

IKALIMA NG DOMINGO SA KWARESMA
Ez. 37:12-14/ Ps. 130:1-8/ Rom. 8:8-11/ Jn. 11:1-45

Panahon sa Kangitngit ug pagkawalay paglaum, ang pagtoo ug gugma maoy kahayag ug giya kanato kay kini mas labaw pa sa kangitngit ug kamatayon.

Karong domingoha dalhon kita ngadto sa pagpamalandong sa nahitabo sa usa ka pinakasuod nga higala ni Jesus nga mao si Lazaro. Si Jesus, diha sa iyang pagsangyaw ug pagbuhat sa kabubut-on sa Amahan, nakabaton ug mga suod nga higala gawas sa iyang mga disipulos. Ug gani, tungod sa gidangatan ni Lazaro tataw ang iyang lawom nga kasubo. Apan wala si Jesus nagpadala sa iyang gibati, iyang gibuhat ang iyang angay nga buhaton. Misugo siya nga ligiron ang bato nga nagtabon sa lub-nganan ni  Lazaro, ug dinhi gipakita ni Jesus ang gahum sa pagtoo nga mas labaw pa kay sa kamatayon. Sa iyang pagmando nga kuhaon ang nagbalot kang Lazaro, dinhi gipakita ni Jesus nga bisan pa man ang nabalot sa kaulipnan sa sala, makabaton sa kagawasan  kung anaa ang hingpit nga pagtoo.

Ang atong kahimtang karon buot mopakita kanato sa nagkalain-laing dagway sa lubnganan sa kinabuhi. Daghan kanato nahiktan sa atong mga bisyo.  Daghan ang nakulong sa pagkawalay paglaum. Daghan ang nagpahipi diha sa kangitngit tungod sa kahadlok kay ginagukod sa ilang mga konsyensya. Sa ingon niini ang Kangitngit ug pagkawalay paglaum milukop diha sa kinabuhi.

Apan si Kristo, panahon niining Kwaresma nagtawag kanato sa paggawas sa atong tagsatagsa ka lubnganan. Gusto niya nga makalingkawas kita sa kung unsa may nagbalot kanato. Buot niya nga makahupot kita sa pagtoo ug gugma aron mahayagan kita ug magiyahan ngadto sa hingpit nga kagawasan.

Kay mao kini ang hinugdan sa iyang pag-anhi. Mao kini ang katuyuan sa iyang pagpasakit ug pagkamatay. Ug pinaagi sa iyang pagkabanhaw iyang gidaug ang tanan aron makabaton kitag kala-uman nga mabanhaw uban kaniya.

Niining dakong gugma sa Dios nga andam mopalingkawas kanato aron gawasnon kita sa pagsimba kaniya, ang atong pagtoo ug gugma mas labaw pa kay sa kangitngit ug kamatayon.