Flores De Mayo, Gasa Alang Kanatong Tanan

Ang Flores de Mayo gasa alang kanatong tanan. Mayo ang bulan diin kitang mga Katoliko makahatag og buhing timaan sa atong paghigugma ug pag-ila sa atong Mahal nga Inahan uban sa Iyang Anak nga si Hesukristo.

Kining maong kalihukan gipahigayon sa matag Gagmay’ng Kristohanong Katilingban (GKK) nga nahisakop sa mga parokya, pinangulohan sa mga Katekista diin sila ang magapadayon sa pagsangyaw sa Maayong Balita ug ingon man pagtudlo sa kabataan, kabatan-onan ug mga hamtong nga anaa sa ilang tagsa-tagsa ka Katilingban. Sa Flores de Mayo usab mapahigayon ang usa ka dakong higayon nga matudloan ug makakat-on ang mga kabataan sa Pag Rosaryo.

Isip usa ka Soccom Catechist sa GKK Sr. Sto. Niño Hillside, Tigatto nga sakop sa Parokya sa St. Mary of the Perpetual Help, Buhangin, dako kaayong gasa ug kalipay ang akong naangkon sa Pagtudlo sa mga kabataan ilabina kung makita nako sa matag human sa maong kalihokan nga ang mga kabataan adunay kabag-ohan kon improvement sa ilang batasan ug panglantaw isip usa ka Kristiyanos nga Katoliko diin silang tanan excited moadto sa Kapilya, moapil sa Pag Rosaryo ug moapil sa Kasaulogan sa Pulong.

Pinaagi sa Flores de Mayo kitang tanan makaamgo nga kitang tanan kabahin sa Gagmayng Kristohanong Katilingban ug ang matag usa adunay bililhong Gasa sa usa’g-usa nga angayan natong ipaambit sa uban sama sa tema sa matag bulan sa Mayo. “PAGTUKOD SA SIMBAHANG PAMILYA DIHA SA GAGMAY’NG KRISTOHANONG KATILINGBAN.”

Karong Mayo 31, sa pagtak-op niining selebrasyon, ipahigayon ang culmination mass sa San Pedro Cathedral Parish nga pangulohan ni Abp. Romulo G. Valles sa alas dos ang takna sa hapon. Duyog kanatong tanan, atong itimbaya ang gasa sa Ginoo kanato, nga si Birhen Maria. (Richie Lubon, GKK SoCCom)