Ika-19 nga kapistahan sa Our Lady of All Nations gisaulog

Gisaulog ang ika-19 nga kapistahan sa GKK sa Our Lady of All Nations, Greenland Phase 2, Cabantian sakop sa sona 3 ilawom sa Parokya sa St. Mary of the Perpetual Rosary Parish, Buhangin.

Gisugdan ang siyam ka adlaw nga pagrosaryo ug pagnobena niadtong Mayo 19 hangtod Mayo 27, 2022 alang sa pagpangandam, pagpasalamat ug pagpasidungog sa mahal nga patron. Niining higayona makita gayud ang pagmaya ug pagpasalamat ngadto kaniya sa makanunayong pagtabang sa matag usa ug sa mga grasya nga nadawat matag adlaw, pinaagi sa mga pag-ampo ngadto sa iyang bugtong anak nga si Hesukristo. Nalabangan ang mga pagsulay nga nasinati sa miaging katuigan nga mao ang pandemya pinaagi usab sa iyang mga pag-ampo sa panalipod.

Ang maong pista gipahigayon niadtong Mayo 28, 2022 uban sa tema: “Si SANTA MARIA inahan sa tanang mga nasod kansang hiyas sulondon sa pagkamapaubsaon ug pagkamasinugtanon sa kabubut-on sa Ginoo”. Gisaulog ang santos nga misa sa alas 7:00 ang takna sa buntag. Ang pagprosisyon gihimo sab niadtong bisperas, adlaw’ng biyernes sa alas 4:00 sa hapon, palibot sa tibuok Greenland Phase 2.

Kanunay’ng ginaampo ug ginahangyo ang panabang sa mahal nga inahan alang sa tanang mga nasod ilabi na alang sa panginabuhian, kabaskog sa panglawas ug proteksyonan kanunay sa mga katalagman. Dinhi usab kung diin iyang hulagway ang patron, ginaampo ang kadasig aron makapadayon ang mga GKK Servant Leaders ug mga myembro sa pagpangalagad sa katilingban. Si Santa Maria ulay nga inahan sa Dios among paglaom sa kanunay ug dalangpanan sa tanan.

Viva Maria! Viva Hesus!

Pag-ampo ngadto sa Inahan sa Tanang Nasod:

Giyahi, tudloi ug dasiga kami o Mahal nga Inahan, aron makalahutay kaming moalagad diha kanimo. Iampo nga ang balaang Espirito Santo magpuyo sa tagsa tagsa namong kasingkasing, aron dili mapalong ang kainit sa among pagpangalagad ngadto sa among GKK ug hangtod ngadto sa among Parokya. Ayaw itugot nga mahimulag kami diha kanimo ug sa Labawng Makagagahom. Ikaw ang among kahayag ug paglaom.

Mapasalamaton kami sa kanunay kay bisan pa man sa among pagkamakasasala imo gihapon kaming giduyogan. Giyahi kami sa hustong dalan, dalan sa kamatuoran nga among pagasubayon. Malipayon kaming tanan maghalad og mga pag ampo ug pasidungog diha kanimo, ang Senyora sa tanang mga Nasod, among Patrona nga mao si Maria ug among manlalaban. Amen.

(Awing M. Abanggan, GKK SocCom)